Kalohan: CNRT–PD asegura ona estabilidade governativa

DILI, 22 juñu 2023 (TATOLI) – Sekretáriu Jerál Partidu Demokrátiku (PD), António da Conçeiçao ‘’Kalohan’’, hateten forsa polítika entre PD ho Kongresu Nasionál Rekonstrusaun Timorense (CNRT, sigla portugés) ho 37 kadeira parlamentár sei asegura estabilidade governativa ba mandatu tinan lima.
“Konserteza koligasaun PD ho CNRT atu lori lejislatura ida ne’e ba to’o rohan. Kadeira 37 ona ne’e laiha tán ona duvida katak la sustenta Governu ida ne’e to’o nia-rohan”, Kalohan dehan ba jornalista TATOLI iha Parlamentu Nasionál, kinta, ohin.
Tuir Kalohan, Lejislatura daneen sei laiha dúvida, tanba sei koalia makas kona-ba interese povu no nasaun nian.
“Interese nasionál ita tenke hatene katak buat hotu ne’ebé mak afeta ba povu nia moris ne’e, interee nasionál, buat hotu ne’ebé mak afeta ba iha nasaun ida ne’e nian ezisténsia, ne’e interese nasionál, buat hotu ne’ebé atu koalia hodi ba rai ida ne’e, ne’e interese nasionál”, nia dehan.
Tanba ne’e, nia hateten, lejislatura daneen halo parlamentu sai duni fatin konsertasaun ne’ebé bele lori Timor-Leste ba oin.
“Ami-nia hanoin mak ida ne’e, bankada sira ne’e mesak bankada polítika de’it, ami dezeja buat ida atu lejislatura ida ne’e sai fila fali marka ida atu haree fila fali konsertsaun polítika hodi lori timor ne’e ba oin. Tanba ita tinan 20 independénsia, ita labele repete bebeik aktu sira ne’ebé mak durante ne’e ita halo”, nia tenik.
Iha fatin hanesan, Deputadu hosi partidu CNRT Aderito Hugo hateten, CNRT ho PD hamutuk sei harii koligasaun ne’ebé forte iha lejislatura daneen hodi sustenta IX Governu ne’ebé tempu badak sei forma hosi CNRT ho PD.
“Iha kompromisu eleitorál, partidu rua, CNRT ho PD iha kompromisu polítiku ne’ebé hanesan, tau atensaun ba ekonómia nasaun nian liuliu rekoopera fila fali situasaun ekonómia ne’ebé perturba tiha tinan neen”, Aderito Hugo afirma.
Nia revela, CNRT ho PD mantein estabiliza governasaun hodi apoiu ba programa orsamentu ba mandatu ida ne’e, tanba CNRT mantein posizaun ho PD nudar aliadu ida ke laiha rezerva hodi kontinua halo programa sira ne’ebé Governu sira la konsege realiza .
“Imi hotu hatene, CNRT nia planu bo’ot tebes iha mandatu ida ne’e mak atu rekopera dezenvolvimentu ekonómia, estabilidade, defeza no seguransa inklui estabilidade governativa ida forte atu bele tama ona ba programa sira ne’ebé pendente hela dezde 2017”, nia akresenta.
Jornalista: Natalino Costa
Editór : Zezito Silva

