Membru PSHT 344 tuir teste ikus prepara ba graduasaun
LIQUIÇA, 24 juñu 2023 (TATOLI)–Koordenadór Organizasaun Arte Marsiál Persaudaraan Setia Hati Terate (PSHT) Liquiça, Horacio da Conceição Araujo, hateten PSHT halo teste ikus ba membru hamutuk na’in-344 iha postu administrativu Bazartete, munisípiu Liquiça, hodi prepara ba graduasaun iha fulan-jullu nia laran.
“Tuir liafuan ami-nian bolu test pra-warga ida-ne’e prepara atu ba gradua iha tinan ida-ne’e nian. Objetivu hosi teste ne’e prinsipalmente haree ba membru sira-nia mentál, fiziku no seluk tan atu nune’e bele tuir graduasaun no ramata ho responsabilidade,” Horacio da Conceição Araujo, hateten ba Agência TATOLI iha Ulmera, sabadu ne’e.
Membru komisaun ba teste membru foun iha postu administrative Bazartete, Elizario Freitas, hateten teste ne’e hala’o de’it ba membru PSHT iha suku hamutuk sia (9) iha postu administrativu Bazartete, munisípiu Liquiça.
“Teste ida ohin ne’e, ita hala’o ba membru PSHT iha postu administrativu Bazartete de’it, suku hamutuk sia (9) mak mai hotu tuir teste ne’e. Membru PSHT hosi suku sia (9) ne’e mak hanesan Fatumasi, Leorema, Lauhata, Maumeta, Metagou, Fahilebu, Ulmera, Motaulun no suku Tibar.
Iha fatin hanesan membru foun ne’ebé tuir ona teste, Marina Soares, hatete sente kontente bele tuir ona teste ne’e no hein atu ba tuir serimónia graduasaun iha fulan-jullu tinan 2023 ne’e.
“Sente kontente tebes tanba ohin ami tuir ona teste. Durante tempu naruk nia laran, ami tuir treinamentu maibé ohin ne’e mak finál ba ami. Ha’u tama treinu ne’e, ha’u rasik mak hakarak, laiha ema ida obriga ha’u. Tanba, haree ba PSHT ne’e kapaas tebes, ne’e mak ha’u hakarak tama,” nia hateten.
Tuir dadus ne’ebé iha, totál membru foun iha munisípiu Liquiça hamutuk 795 mak tuir ona teste atu prepara ba tuir graduasaun iha tinan ne’e.
Prosesu treinamentu ba membru ida atu sai hanesan warga PSHT liuhosi prosesu ne’ebé naruk, tanba treinu másimu tinan haat ba leten tanba tinan ida sa’e sintu ida hanesan metan ba mean, mean ba modok, modok ba mutin kiik no mutin kiik ba mutin boot, kada tinan teste sintu dala ida.
Tuir sirkulár ne’ebé fó sai iha semana kotuk hosi KRAM (24 juñu) iha teritoriu nasionál organizasaun PSHT tenke halo teste ikus ba membru foun sira antes hakat ba graduasaun iha fulan-jullu 2023.
Membru PSHT 116 iha Covalima tuir teste
Entretantu, iha domingu (25/06) ne’e, kandidatu membru pratikante na’in-116 hosi Organizasaun Arte Marsiál Persaudaraan Setia Hati Terate (PSHT) iha postu administrativu Maucatar, munisípiu Covalima, tuir teste prátika molok partisipa graduasaun iha fulan-jullu 2023.
“Atividade hala’o teste prátika pra warga ba membru-sira hanesan kritéria-ida hosi organizasaun molok atu ba graduasaun. Tuir prosesu, hosi sintu polos atu ba jambu, hosi jambu ba hijau, hosi hijau ba putih kecil, hosi putih kecil atu hetan sintu putih besar, ami tenke tuir teste pra warga,” Sekretáriu Organizasaun PSHT Covalima, Damião Amarál, hateten ba Agência Tatoli iha suku Belekasak, postu administrativu Maucatar, domingu ne’e .
Kandidatu membru PSHT na’in-116 tuir teste prátika molok atu tuir graduasaun, tanba teste prárika sai hanesan kritéria ida hosi Organizasaun Arte Marsiál Persaudaraan Setia Hati Terate (PSHT).
Tuir dadus, kandidatu ne’ebé tuir teste iha Covalima hosi postu administrativu sira hanesan iha loron 24 fulan-juñu akontese iha postu Tilomar ho membru na’in-47, postu Suai ho membru na’in-182 no iha loron 25 fulan-juñu iha postu Maucatar ho nia membru na’in-116.
Prosesu atu tuir teste prátika, nia dehan, tenke liuhosi treinamentu ho nia durasaun tempu durante fulan neen, hafoin hela de’it fulan-ida atu tama iha serimónia graduasaun.
Kandidatu Warga tuir teste prátika ne’e bazeia ba planu hosi Sekretáriu PSHT Nasionál, tanba iha loron 11 fulan-agustu tinan ne’e, sei iha serimónia graduasaun ba membru PSHT iha munisípiu Covalima.
Reprezentante administradór postu administrativu Maucatar, António Marçal Amarál, autoridade nia prezensa iha atividade teste ba kandidatu sira fó motivasaun hodi kria amizade no unidade, iha postu Maucatar atu labele hamosu dezentendimentu entre grupu arte marsiál sira.
“Autoridade mai partisipa atividade teste prátika hosi Organizasaun Arte Marsiál (PSHT) atu fó motivasaun ba joven no organizasaun hotu ne’ebé eziste iha postu Maucatar atu kria amizade no unidade, nune’e labele hamosu dezentendimentu entre organizasaun arte marsiál sira,” nia dehan.
Autoridade ne’e mós hato’o agradese, tanba foin dahuluk organizasaun arte marsiál PSHT hodi organiza teste prátika ba kandidatu membru Organizasaun Arte Marsiál PSHT nian iha Covalima.
Prezidente Sub-KRAM Covalima, Francisco Barros, husu ba organizasaun arte marsiál sira atu kolabora malu hodi kuida estabilidade, pás no hadomi malu iha Covalima.
Jornalista : Hortencio Sanchez/Celestina Teles
Editór : Cancio Ximenes
