Estudante UNPAZ 130 hala’o estájiu profisionál iha munisípiu rua
DILI, 25 juñu 2023 (TATOLI) – Estudante na’in 130 husi Universidade da Paz (UNPAZ), fakuldade teknolojia agríkola (FTA), departamentu prosesamentu ai-hán no konservasaun rekursu naturál dezloka ona ba munisípiu Aileu Rejiaun Espesiál Oé-cusse Ambeno (RAEAO) hodi hala’o atividade estájiu profisionál durante loron 30 nia laran.
Reitór Universidade da Paz, Adolmando Soares Amaral, esplika, atividade estájiu ne’e bazea bá kalendáriu akadémiku nian hodi kompleta grau estudu ne’ebé maka universidade termina ona no estudante sira tenke kompleta molok termina sira ninia nível lisensiatura.
“Atividade estájiu profisionál ne’e mai husi kalendáriu akadémiku nian ne’ebé termina ona bá estudante sira molok termina sira nia nível lisensiatura iha universidade nia laran,” Adolmando informa asuntu ne’e bá Tatoli iha kampus UNPAZ, domingu ne’e.
Mínimu estudante sira bainhira atu termina estudu hodi hetan nível lisensiatura iha UNPAZ ne’e sira tenke tuir lai prosesu aprendizajen no tenke hala’o estájiu profisionál hotu hafoin estájiu sosiál no halo aprezentasaun obra sientífiku depois halo peskiza no aprezenta rezultadu ikus mak foin bele hetan direitu nu’udar estudante lisensiatura iha area konsentrasaun ida-idak nian.
Reitór Adolmando, dehan, estájiu profisionál ne’ebé UNPAZ loke ba estudante FTA na’in 130 ne’e atu demonstra bá maluk agrikultór timoroan sira iha foho saida maka sira hetan durante estuda iha UNPAZ. Liuhosi orientasaun no halo transformasaun mentalidade tuir siénsia teknolojia agríkola ne’ebé estudante sira hetan iha universidade nia laran.
“Ami loke estájiu profisionál bá imi ne’e atu fó oportunidade bá imi hodi demonstra fali ba ita-nia maluk agrikultór timoroan sira ne’ebé iha foho ne’ebá atu orienta sira, transforma sira nia mentalidade. tanba sira iha ona esperiénsia hanesan vida agrikultór, maibé imi bá atu kuda sira nia mentalidade no fó esperiénsia bá sira tuir siénsia teknolojia agríkola ne’ebé imi aprende atu hasa’e rezultadu agrikultór iha Timor,” nia katak.
Nune’e mós Dekanu Fakuldade Teknolojia Agríkola, Jonio dos Santos, husu ba estudante sira atu aproveita tempu estájiu ne’e hodi hala’o servisu tuir responsabilidade hodi tane aas almamater universidade nian ba komunidade sira iha Munisípiu rua ne’e. tenke halo tuir regra sira tenke servisu ho responsabilidade ka servisu ho komitmentu hodi nune’e bele hatudu atitude ho di’ak.
“Ha’u hakarak hateten ba ita-boot sira katak fulan ida nia laran ne’e la loos lalais liu, la loos kleur liu maibé natoon atu imi bele halo atividade balun, obrigasaun ne’ebé mak imi atu halo mak kada atividade imi tenke deskreve kedas iha imi nia relatóriu diáriu, Atu nune’e imi bele prepara semana ida hanesan ne’e hodi bele hala’o ezame imi ninia relatóriu estájiu profisionál ne’e,” dehan dekanu ne’e.
Portantu estudante na’in 130 husi fakuldade FTA departamentu rua UNPAS nian ne’e dezloka ona ba munisipiu rua ne’e hahí horiseik (24/06) no sei fila fali iha fulan jullu tuir kalendáriu estájiu ne’ebé termina ona
Jornalista: Tomé Amado
Editór: Evaristo Soares Martins
