DILI, 26 juñu 2023 (TATOLI) – Diretora Nasionál Patrimoniu Dezenvolvimentu Infraestrutura Sekretáriu Estadu Juventude no Desportu (SEJD), Maria Luisa Monteiro informa, kona-ba kontinuasaun konstrusaun Estádiu Munisipál Manatuto Konsellu Administrasaun Fundu Infraestrutura (KAFI) foti ona desizaun iha fulan kotuk atu kontinua obra ne’e.
“Estádiu Manatutu nia prosesu desizaun iha KAFI foti ona iha 02 maiu liubá, nia prosesu agora daudaun ita halo hela verifikasaun iha Ajénsia Dezenvolvimentu Nasionál (ADN) tempu besik hetan ona rezultadu lori fila fali ba KAFI atu deside kompaña ne’ebé durante ne’e halo hela servisu atu kontinua finaliza,” Diretora ne’e ba Agência Tatoli iha edifísiu SEJD Lecidere Dili, segunda ne’e.
Nia dehan, durasaun konstrusaun ba Estádiu Manatuto kle’ur demais no fiar katak kompaña ne’ebé hetan konfiansa hosi KAFI bele finaliza lalais.
“Estádiu Manatuto ne’e ita rekoiñese katak kle’ur demais ona, ita husu membru Governu foun mai koopera hamutuk hodi finaliza obra ne’e,” nia hatete.
Obra ba Estádiu ne’e antes ne’e kompaña Obrai Unipesoal Lda mak konstroi maibé hetan mudansa iha estrutura kompaña, maibé ikus na’in ba kompaña hakotu ona nia peregrinasaun iha mundu ne’e iha tinan 2022 fó impaktu ba konstrusaun ne’e.
Maibé durante ne’e kompaña Obrai fó fali kontratu ba kompaña Vicsun mak kontinua obra ne’e, liuhosi verifikasaun KAFI no ADN hare Vicsun halo servisu di’ak tebes foti ona desizaun entrega ba Vicsung mak atu kaer to’o finaliza maibé sei iha prosesu nia laran.
“Diretór kompaña kaer obra ne’e mate tiha, maibé servisu durante ne’e la’o hela tanba kompaña Vicsun mak halo hela servisu ita haree prosesu di’ak tebes maske laiha kontratu legál maibé nia só iha kontratu ho Obrai hodi halo obra ne’e, maibé haree ba kompaña Obrai nia na’in mate tiha KAFI sei haree oinsá atu fó fali fiar ba Vicsun mak kontinua servisu hodi finaliza obra ne’e,” nia hakotu.
Estádiu Manatuto hahú konstrusaun iha 2015, ne’ebé kaer hosi Kompaña Obrai Unipessoal Lda ho númeru kontratu TCB/0128/SEJD-2014, ho totál orsamentu $2.363.976 44, maibe Tha 2022 Governu tenke aumenta tan adisionál osan hamutuk $184.741.35 ho kontratu fulan-ualu hahú hosi fevereiru-setembru 2022.
Tanba ne’e ho totál orsamentu ne’ebé gasta ba Estádiu ne’e hosi kontratu tuan no adisionál hamutuk $2.547.717,79
Jornalista: Hortencio Sanchez
Editór : Rafael Ximenes de A. Belo
