DILI, 27 juñu 2023 (TATOLI) – Atu sai formadór iha Ajénsia Dezenvolvimentu Timor-Leste (ETDA, sigla inglés) tenke iha sertifikadu kualifikasaun nivel 3 no 4, hatete Diretór-Ezekutivu ETDA, Januário Neto Mok.
Tanba ne’e ETDA seidauk atribui lisensa hanorin ba formadór na’in-10 tanba ladauk iha sertifikadu kualifikasaun refere.
Diretór-Ezekutivu ETDA, Januário Neto Mok, esplika katak bazeia ba kritériu ne’ebé iha, formadór ne’ebé konklui ona mestradu ka doutoramentu, maibé seidauk iha sertifikadu kualifikasaun nivel 3 no nivel 4 seidauk bele disponibiliza formasaun ba formandu sira.
“Tanba ida ne’e kritériu ida ne’ebé tenke kumpre. Iha ETDA rejista ona formadór hamutuk na’in-15, signifika iha lima de’it maka kompleta ona sertifikadu nivel 3 no 4 no 10 seidauk iha sertifikadu sira ne’e. Sira na’in-10 ne’e rasik sei tuir uluk formasaun nivel 3 iha ETDA depois hetan tiha sertifikadu kualifikasaun hanorin nian mak bele kontinua fali ba nivel 4”, Januário Mok hatete iha Fatuhada, ohin.
Nia salienta katak formasaun nivel 4 ne’e ETDA sei rekomenda atu formadór foti iha estranjeiru, hanesan iha Indonézia no nasaun sira seluk tanba konsidera katak sira ne’e merese ona atu hanorin iha área espesífika sira bazeia ba nivel ne’ebé foti ona.
Dezde ezisténsia ETDA nian konsege prodús ona formadu hamutuk rihun 37-resin iha área kualifikasan oioin. Ema sira ne’ebé mak remata ona sira-nia formasaun mai husi fatin oioin husi komunidade universitária, serbisu-na’in sira iha instituisaun Estadu no privada. Hahú iha 2017 mai to’o ohin loron ema sira ne’ebé mak kandidata-aan ba formasaun ne’e entre rihun 1 no 2.
“Dala barak ami enfrenta difikuldade tanba fatin mak la sufisiente, maibé ho númeru ne’ebé ami rejista, ami nafatin tau iha konsiderasaun hodi halo formasaun tuir limitasaun fatin to’o kompleta númeru ne’ebé ami iha”, katak.
Formasaun ne’ebé maka ETDA fornese mak iha área espesífika hanesan turizmu, lian inglés, kulinária, administrasaun no finansa.
Jornalista: Tomé Amado
Editora: Maria Auxiliadora
