DILI, 27 juñu 2023 (TATOLI)- Komandante Operasaun Nasionál Polisia Nasionál Timor-Leste, Superintendente Xefe José Soares, fó ona orientasaun ba Komandante Munisipiu sira no Komandante Eskuadra sira atu buka tuir autór ne’ebé habosok labarik sira bainhira atu ba eskola no konsege espalla iha rede sosiál.
“Ita fó hatene no fó ona orientasaun ba Komandate munisipiu sira atu buka tuir autór ne’e no buka hatene mós iha fatin ka área ne’ebé para aprezenta mai PNTL, nune’e ita halo prosesu ba nian”, hateten Komandante Operasaun Nasionál ne’e ba jornalista sira iha Komandu PNTL, tersa ne’e.
Komandante Operasaun Nasionál hato’o kestaun ne’e relasiona video ne’ebé mak espalla iha rede sosiál, bainhira labarik ka estudante sira atu ba eskola iha autór feto no mane ida ne’ebé ho motór hodi habosok alin estudante.
Ho hahalok ne’e, nia dehan asaun ne’e dala ruma halimar, maibé PNTL konsidera ameasa labarik no hakarak faan labarik ne’e krime.
“Ita presiza foti asaun atu labele lori halimar buat ne’ebé la’ós halimar nian,” katak nia.
Nune’e, nia husu ba joven sira atu hatudu ezemplu ka hahalok di’ak ba labarik sira tanba ho liafuan sira hanesan ne’e bele fó presaun pisikolojia ba alin estudante sira.
“Ha’u hakarak apela ba sira ne’ebé mak halo video sira hanesan ne’e hahalok ne’ebé mak ladi’ak, tanba lori presaun ne’ebé ladi’ak iha ita-nia alin sira,” Nia apela.
Jornalista: Natalino Costa
Editór : Florencio Miranda Ximenes
