iklan

HEADLINE, SEGURANSA

Alfándega-PNSIK halo apreensaun ba karreta importa ida iha Tibar

Alfándega-PNSIK halo apreensaun ba karreta importa ida iha Tibar

Komisáriu Autoridade Aduaneira, José António Fátima Abílio. Imajen TATOLI/Francisco Sony

DILI, 28 juñu 2023 (TATOLI) – Autoridade Aduaneiru hamutuk ho Polísia Nasionál Servisu Investigasaun Kriminál (PNSIK) halo apreensaun ba karreta ida iha Portu Tibar ne’ebé mak hatama hosi Empreza RMS tanba tenta lakohi selu taxa.

Komisáriu Autoridade Aduaneiru (Alfándega) José Fátima Abilio, hateten ekipa konjunta kompostu hosi Alfandega no PNSIK halo buska no apreensaun ba karreta ida iha Portu Tibar, tanba hatama liuhosi dalan ilegál no lakohi selu taxa.

Karreta ne’e hatama hosi kompañia RMS iha loron 14 fulan juñu 2023 no iha momentu ne’e kedan parte relata kadan ba iha Autoridade Porturiu katak sasan iha kontentór laran ne’e maioria Triples de’it.

Iha 27 juñu 2023, Ajénsia Pasific loke kontentór atu halo inspensaun no hakfodak tanba derepente hetan fali karreta ida iha kontentór laran, bainhira Ajensia Pasific ne’e atu halo inspesaun ba karreta ne’e seguransa kompañia la autoriza, tanba ne’e, Autoridade Aduaneiru liuhosi jestaun risku kontatu kedan PNSIK hodi mai halo buska no apreensaun.

Iha buska ne’e, ekipa Alfándega no PNSIK deteta katak kompañia ne’e tenta hatama karreta ho ilegál, tanba bazea ba lista sasan importadu ne’ebé iha kontentór laran, iha de’it sasan (triplek), maibé la inklui karreta.

“Kompañia nia intensaun ne’e hakarak halai ses hosi pagamentu taxa, lakohi selu taxa, ba karreta ne’ebé sira hatama mai. Agora ita tau ona police line iha karreta ne’e hodi hein prosesu”, Komisáriu Autoridade Aduaneiru (Alfánga) José Fátima Abilio hateten ba jornalista sira iha nia kna’ar fatin Palásiu Governu, kuarta ne’e.

Nia dehan, hosi parte Alfandega konklui ona prosesu dokumentu atu tau ona iha auto partisipasaun hodi haruka ba Ministériu Públiku.

“Dokumentu sira, ami fó hotu ona ba PNSIK para prosesa ba krime, hodi kontinua prosesa ba Ministeriu Públiku”, nia informa.

José Fátima Abilio, esplika kuandu importa karreta mai Alfándega tenke halo inspesaun jerál no tenke selu taxa.

“Iha kazu ida ne’e, konserteza nia (empreza) hatama karreta ilegál, tanba la selu taxa no karreta ne’e prosesu ba ona Ministériu Públiku no karreta ne’e atu afavór ba Estadu, ne’e depende ba prosesu”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!