DILI, 30 juñu 2023 (TATOLI) – Aserbispo Arkideoseze Díli, Dom Virgílio Kardeál do Carmo da Silva, SDB, kongratula Governu da-sia ne’ebé simu posse iha sabadu (1/7) no husu atu respeita povu nia votu hodi hadia povu nia moris.
“Ha’u nia parabens dala ida tan ba ita-nia IX Governu ne’ebé simu pose, los duni katak povu depois halo votasaun no agora povu hakarak kontente katak depois povu fó fiar, hakat ona ba iha pose. Ha’u hanoin katak buat ne’ebé povu hein ho pose ida ne’e, atu sira hahú servisu tinan lima, ida ne’e hodi servi povu ida ne’e, hatan ba povu ida ne’e nian halerik ninia nesesidade ne’ebé durante ne’e povu barak sei sente hela”, Dom Virgílio Kardeál do Carmo da Silva hateten ba jornalista sira iha Komandu Eskuadra Remexio, sesta foin lais.
Nia dehan, dala barak sempre rona Governu da-sia ninia moto ne’ebé Primeiru-Ministru Xanana Gusmão nian koalia kona-ba Governu ne’e atu servi povu.
“Ha’u hanoin povu ida ne’e hakarak duni hirak ne’ebé mai iha votande servi, servi atu nune’e ajuda duni povu ida ne’ebé ki’ak no mukit. Tanba depois dekada rua iha fatin barak hanesan Remexio de’it mós haree katak estrada seidauk tún to’o mai iha ne’e”, Dom Virgílio haktuir.
“Loron hirak ne’e ha’u la’o to’o iha área remota hanesan Aileu ninian, horbain rua ami iha Lobului Daisoli nian leten haree eletridadade seidauk asesu inklui bee moos no estrada sei falta ba povu hirak ne’e. Ha’u hanoin esperansa uma kreda ninia mak esperansa povu ida ne’e ninian moris di’ak, moris iha hakmatek”, nia hatutan.
Hatan kona-ba sorumutu entre lider Xanana Gusmão no Taur Matan Ruak, hakuak malu Dom Virgílio konsidera ida ne’e esperansa bo’ot ida, mehi bo’ot ida no hatudu unidade nasionál, hahú ona hosi Governu da-sia.
“Antes ha’u to’o iha ne’e, ha’u komesa rona kedas ona ohin dader oinsá relasaun, la’os de’it povu baibain maibé husi mós timoroan inteletuál, autoridade lokál balun ema komesa espresa ksolok ida ne’e. Ita nia nai ulun sira fó liman ba malu, hakuak ba malu, liuliu vespera ba inisiu Governu da-sia nian ida ne’e
Nia dehan, povu nia hakarak mak pás no estabilidade, ita bele halo buat hotu, Governu bele halo buat hotu, maibé laiha pás signifika laiha dezenvolvimentu.
“Husi liur ne’e ita kaber, laran ne’e mamuk, maibé ita hahú kedan hosi loron dahuluk hodi hatudu buat di’ak, ida ne’e ha’u hanoin, la’os de’it uma kreda ninian hakarak. Maibé povu hotu nian hakarak duni atu unidade nasionál, ida ne’e tenke hatudu, ida ne’e hatudu bainhira ita-nia membru Governu foun sira” Dom Virgílio hakotu.
Jornalista: Natalino Costa
Editór : Zezito Silva
