Komandu PNTL husu Governu foun prioriza infraestrutura no moris di’ak membru

DILI, 30 juñu 2023 (TATOLI) – Komandante Komandu Pesoál no formasaun, Polísia Nasionál Timor-Leste Superintendente Xefe Polísia Arquemíno Ramos, husu ba Governu Ministru Interiór foun atu prioriza hadia infraestrutura bázika sira iha PNTL no tau importánsia ba bem estar membru PNTL sira-nian atu sira bele dezenvolve.
“Ami-nia esperansa ba Governu foun liuliu Ministru Interiór foun oinsá maka hadia bem-estar PNTL ninian, depois tau importánsia ba infraestrutura iha PNTL liuliu radiu komunikasaun no mós ekipamentu seguransa sira seluk atu profisionaliza instituisaun seguransa. Tanba instituisaun PNTL atu dezenvolve di’ak liután, iha buat ida importante mak ita hanaran 5W, Well friend, well trend, well enquestion, well equipment, well motivates, well salary, hirak ne’e bele apoiu instituisaun ne’e bele sai profisionál. Tanba ne’e ami nia esperansa mak ba ministru foun mai maka ida ne’e”, Superintendente Xefe Polísia Arquemíno Ramos hateten bá jornalista sira iha Sentru Formasaun (CFP, sigla portugés) Comoro.
Nia esplika, institusaun PNTL presiza halo dezenvolve di’ak liután atu instituisaun PNTL tenke ho fazeadamente liuliu fó kapasitasaun ba rekursu umanus, alokasaun orsamentu ne’e, barak ba área formasaun, tantu rai laran no rai-liur.
Arquemínio Ramos lori naran Komandu PNTL, agradese ba Vise Ministru Interiór (VMI), António Armindo, tanba iha nia mandatu, enfrenta situasaun ida difísil, liuliu pandémia globál covid-19, maibé liuhosi kapasidade lideransa ninian mak bele halo negosiasaun ho parseiru sira nasionál no internasionál sira, to’o husik hela obra balu iha PNTL.
“Durante ne’e kooperasaun servisu di’ak tebes, embora ita iha situasaun covid, vise ministru, eselénsia ninia esforsu, halo lobby ho parseiru internasional sira, konsege konstrui ona ita-nia postu UPF sira iha fronteira, ne’e la’ós mai hosi orsamentu nian, até parseiru sira hosi setór privádu mós kontribui, halo postu tránzitu iha Dili laran, rede tiru iha Kaitehu, eselénsia vise ministru nia esforsu lubuk ida, ne’ebé durante ne’e halo”, nia dehan.
Nia dehan, susesu sira ne’e, la’ós hosi orsamentu Governu ninian, maibé, doasaun hosi parseiru sira, hodi fasilita kursu, iha rai-liur no infraestrutura mós, ema hotu akompaña rasik, konsege inaugura tiha ona postu seguransa lubuk ida no infraestrutura lubuk ida mak hatudu iha mudansa.
Jornalista: Natalino Costa
Editór : Zezito Silva

