Kompañia tolu sai manán-na’in projetu reabilitasaun estrada rurál iha Baucau
BAUCAU, 30 juñu 2023 (TATOLI) – Kompañia lokál hamutuk tolu sai manán-na’in ba projeitu reabilitasaun estrada rurál munisípiu Baucau hosi Ministériu Obra Públika (MOP).
Diretór Serbisu Munisipál Obra Públika Baucau, Pedro Alexandre Guterres Perreira, esplika, kompañia hirak-ne’e komposta hosi Nautetu Fatima Unip.Lda, Lampung Stat Unip.Lda no Rozi Unip.Lda ne’ebé sei responsabiliza ba reabilitasaun estrada rurál hamutuk pakote lima ho tótal kilómetru 30 resin.
“Ita iha avansu tán liuhosi orsamentu 2023 bainhira propoin ba nasionál konsege aprova ho totál projetu reabilitasaun estrada rurál hamutuk pakote lima,” Diretór Serbisu Munisipál Obras Publiku Baucau informa ba Agência TATOLI iha Vila Antiga, sesta ne’e.
Hosi pakote lima refere Kompañia Nautetu Fatima Unip.Lda sei reabilita iha fatin rua hanesan Dailari ba Samaguia distánsia hosi kilómetru 2,3 to’o 4,63, total orsamentu $436.794,48 no pakote Sagate ba Belulali distánsia kilómetru 3,25 ho nia orsamentu hamutuk $455.236,93.
kompañia Rozi Unip.Lda sei reabilita estrada diresaun hosi Abuti ba Serebu’u pakote I hosi kilómetru 0 to’o rua resin ho orsamentu hamutuk $ 469.477,40.
Enkuantu kompañia Lamegua Unip.Lda responsabiliza pakote rua III no IV hanesan estrada Abuti ba Serebu’u distánsiaa hosi kilómetru haat to’o neen ho tótal orsamentu $ 444.846,55 no pakote kondisaun hosi kilómetru neen ba ualu ho orsamentu hamutuk $425.475,31.
“Duransaun obra tinan-ida konta hosi bainhira kompañia asina kontratu,” Pedro Guterres akresenta.
Tuir dadus, totál estrada rurál iha Baucau hamutuk kilómetru 440 resin no reabilita ona pursentu 50 no hela pursentu 50 mak presiza halo reabilitasaun hodi fasilita movimentasaun transporte.
Jornalista : Natalino Belo
Editór : Evaristo Soares Martins
