Nélio Isaac prioriza infraestrutura iha área desportu

DILI, 01 jullu 2023 (TATOLI) – Ministru Juventude Desportu Arte no Kultura (MJDAK) Nélio Isaac Sarmento, hateten programa prioridade ne’ebé sei hala’o durante loron 100 iha área desportu mak atu tau importánsia ba infrastrutura ne’ebé to’o agora seidauk resolve.

“Ministériu ida ne’e foun tanba uluk hanesan de’it sekretáriu estadu maibé agora sai ona ba ministériu, ita sei haree estuda halo didiak, haree tiha situasaun iha laran depois mak komesa trasa planu, maibé ba desportu nian mak ita tau prioridade ba infraestrutura sira ne’ebé seidauk iha kondisaun”, ministru dehan ba Agência TATOLI hafoin remata posse iha Palásiu Prezidensiál Nicolau Lobato Dili, sábadu ne’e.

“Atu hahú ba prosesu bo’ot sira, ita sei hahú ho buat kiik balu, liuliu organizasaun desportu sira ne’ebé forma ona, ita buka atu halo sira profisionál oituan, nune’e bele atribui kbiit ruma ba sira atu hala’o atividade desportu, maibé agora prioridade uluk mak infraestrutura”, nia dehan.

Nia sei kontinua servisu desportiva no juventude nian ne’ebé mandatu Sekretáriu Estadu Juventude no Desportu (SEJD) la konsege konklui, sei kontinua atu dezenvolve talentu juventude sira nian iha nasaun ne’e.

Jornalista: Hortencio Sanchez

Editór : Zezito Silva