DILI, 03 jullu 2023 (TATOLI) – Ministra Edukasaun, Dulce de Jesus Soares, sei avalia fali kualifikasaun profesór kontratu na’in-1.715 ne’ebé Ministériu Edukasaun, Juventude no Desportu (MEJD) kontrata ona.
“Hanesan Ministra Edukasaun ha’u mós hakarak garante kualidade edukasaun iha ita-nia rain atu asegura kualidade ita-nian profesór na’in-1.715 ne’ebé Ministériu Edukasaun, Juventude no Desportu iha VIII Governu kontratu ona, ha’u tenke halo fali avaliasaun ba sira-nian kualifikasaun pesoál”, Dulce de Jesus informa asuntu ne’e iha ámbitu serimónia tranferénsia serbisu iha Vila Verde.
Avaliasaun ne’ebé sei halo ne’e, tuir ministra foun ne’e katak “atu haree fali profesór na’in-1.715 ne’e prienxe duni kualifikasaun ka la’e, signifika sira iha duni kualifikasaun méritu hodi sai profesór kontratadu? Tanba ko’alia kualidade iha edukasaun ne’e la’ós atu hasa’e de’it kuantidade profesór, maibé tenke garante uluk kualidade. Kuandu avaliasaun ne’e hatudu rezultadu di’ak maka sei kontinua loke tan prosesu ba oin”, afirma.
Governante ne’e esplika katak husi avaliasaun ne’e mak sei hatudu nia rezultadu no sei fó tempu atu halo desizaun saida, tanba ne’e asuntu polítiku no presiza iha levantamentu ba informasaun.
Dulce de Jesus relembra katak molok nia husik mandatu nu’udar Ministra Edukasaun iha VIII Governu durante tinan rua nia laran ne’e, nia ho ekipa téknika sira halo ona kuadru pesoál ba profesór sira. Tuir nia, iha ona dadus ba manorin sira katak iha matemátika presiza na’in hira, biolojia hira, nune’e sei koloka ba eskola sira atu apoia perosesu aprendizajen. Dadus pesoál ba profesór sira ne’e kria tuir kada dixiplina ida-idak nian ne’ebé forma iha 2020.
“Agora ita-nian Ministériu Edukasaun, Juventude no Desportu sesante bainhira halo mudansa ba dadus no halo desizaun ne’ebé hatuur ona iha 2020 ne’e bazeia ba kuadru pesoál ne’ebé maka ami kria ona ne’e ka iha fali kuadru pesoál foun seluk?”, nia kestiona.
Ho desizaun ne’ebé maka VIII Governu foti ona hodi kontrata manorin voluntáriu 1.715 ba permanente ona no sei falta 538 ne’ebé iha hela prosesu nia laran ne’e IX Governu labele simu de’it, maibé presiza halo fali verifikasaun.
Sorin seluk, Ministru Edukasaun, Juventude no Desportu sesante, Armindo Maia, husu ba Ministra Edukasaun atuál, Duce de Jesus, atu tau nafatin atensaun ba profesór voluntáriu sira ne’ebé mak tama ona iha prosesu kontratu atu sira bele hetan direitu hodi muda sira-nian estatutu.
“Ha’u-nian mandatu durante tinan 3 nia laran, ha’u halo ona esforsu hodi rezolve destinu profesór voluntáriu sira, kuaze iha na’in-1.715 maka hakat ona ba kontratadu”, Armindo Maia rekomenda.
Dadus profesór voluntáriu ne’ebé sai ona kontratadu hamutuk 1.715 nia prosesu atu hetan legalidade sei iha hela serbisu Komisaun Funsaun Públika nia liman.
Tanba ne’e, ministru sesante husu atu membru Governu foun ne’e bele halo esforsu ruma hodi konfirma ho dadus sira ne’e atubele hetan desizaun hodi hatuur loloos sira-nian direitu.
Ba manorin voluntáriu 538 ne’ebé seidauk hetan kontratu “ida ne’e maka sei sai difikuldade ida no rekomenda bá Ministra Edukasaun atuál atu loke fali prosesu verifikasaun ho didi’ak ba dadus profesór 500-resin ne’ebé mai husi faze daruak atu hetan direitu ba kontratadu”.
Prosesu rekrutamentu no selesaun ba profesór voluntáriu entre 2021 no 2022 no tama iha 2023 maka foin anunsia rezultadu sira ne’e. Antes ne’e, iha totál profesór voluntáriu hamutuk 2.910 hosi munisípiu 13, la inklui Rejiaun Administrativa Espesiál Oé-Cusse Ambeno (RAEOA) maka MEJD halo ona selesaun.
Hosi prosesu selesaun dokumentu ne’ebé ekipa juri hosi MEJD halo ne’e konsidera iha de’it totál dokumentu hamutuk 1.539 mak prienxe kritériu no dokumentu hamutuk 1.371 la admitidu. Hosi totál dokumentu hamutuk 1.539 admitidu ne’e depois aumenta tan ho profesór 176 husi Programa Eskola iha Uma ne’e mak sa’e ba 1.715 maka avansa ba kontratadu.
Totál profesór voluntáriu ne’ebé hakat ona ba kontratadu ne’e mai husi Pré-Eskolár hamutuk 121, Ensinu Báziku 894, Sekundáriu Jerál 398, Tékniku Vokasionál 126 no Programa Eskola iha Uma 176.
Notísia relevante: Submisaun dadus tarde, difikulta estatutu profesór reklamante sira
Jornalista: Tomé Amado
Editora: Maria Auxilidora
