UNTL fó omenajen ba Miguel Maia ho lansamentu livru Maklokek ba Psikolinguístika

DILI, 03 jullu 2023 (TATOLI) – Sentru Estudu ba Kultura no Arte (SEKA) Universidade Nasionál Timor Lorosa’e (UNTL) lansa ona livru Maklokek ba Psikolinguístika, autoria husi profesór Miguel Maia.  Lansamentu livru ne’e nu’udar forma ida hodi fó omenajen ba ninia dedikasaun iha setór edukativu, partikularmente dezenvolvimentu rekursu umanu iha UNTL.

Livru ne’e espésie giaun introdutória ba dixiplina Psikolinguístika ba Departamentu Ensinu Língua Tetun, Fakuldade Edukasaun, Arte no Umanidade. Eventu ne’e mós halo hodi asinala aniversáriu mate profesór Miguel Maia nian.

Diretór SEKA, Vicente Paulino, hatete livru Maklokek ba Psikoliguístika ne’ebé ohin lansa ne’e mai husi esforsu profesór sira iha Departamentu Dalen Tetun, ekipa Institutu Nasionál Linguístiku (INL) no SEKA nian.

“Ami fiar katak livru ida ne’e sei sai referénsia ba introdusaun dixiplina Psikolinguístika atu ajuda estudante hodi halo leitura no bele hakle’an sira-nian koñesimentu kona-ba konjugasaun entre psikolojia no linguístika”, Vicente Paulino informa asuntu ne’e hafoin serimónia lansamentu, iha kampus Liceu.

Nia realsa katak maski autór laiha ona, maibé nia obra sira nafatin prezente iha prosesu ensinu-aprendizajen iha alunu no manorin sira-nian leet.

Maklokek ba Psikolinguístika sai hanesan símbolu ka lalatak husi hakerek-na’in nia prezensa reál iha mundu siénsia Timór nian. Livru ida ne’e iha pájina 82 no iha kapítulu neen ne’ebé ko’alia kona-ba natureza, istória no problema psikolinguístiku, sitakse, diskursu, semántika, relasaun biolójika no prosesu kongnitivu ne’ebé entre psikolojia no linguístika.

“Dixiplina ne’ebé nia hanorin kona-ba Maklokek ba Psikolinguístika ne’e kuaze kompleta tiha ona kada kapítulu, maibé depois nia mate SEKA iha hanoin ida katak tenke rekolla matéria sira ne’ebé nia hanorin atubele hatuur iha livru ida hodi bele públika. Nune’e, estudante sira bele aprende hodi hanoin fali profesór Miguel Maia ninia lala’ok hanorin nian iha interasaun ho Maklokek sira iha aprendizajen”, Vicente Paulino salienta.

Dirijente SEKA ne’e realsa katak loloos ne’e livru refere lansa tiha ona iha loron 06 juñu, data ne’ebé autór moris, maibé la konsege tanba iha buat balun maka impede tiha.

Miguel Maia dos Santos moris iha 06 juñu 1962 no mate iha 03 jullu 2021. Hanesan dosente iha Departamentu Tetun no investigadór INL nian. Sai Dekanu Fakuldade Edukasaun, Arte no Umanidade entre 2000 no 2007. Iha 2017 no 2020, asume kargu Vise-Reitór Asuntu Akadémiku UNTL. Iha 2016 no 2017, hanesan Vise-Reitór Asuntu Provedoria Akonsellamentu universidade nian.

Jornalista: Tomé Amado

Editora: Maria Auxiliadora