Bandeira RDTL la monu ba rai, salva hosi seguransa
DILI, 06 jullu 2023 (TATOLI) – Inspetór Jerál Ministériu Juventude Desportu no Arte Kultura (MJDAK) João dos Santos, esplika Bandeira Repúblika Demokrátika Timor-Leste (RDTL) la konsege monu ba rai tanba salva hosi seguransa, Jacob Sarmento da Silva.
“Ministériu Juventude Desportu no Arte Kultua nia oin iha tersa (04 jullu) loraik, iha tempu ne’ebá seguransa hamutuk na’in tolu mak baibain hasae no hatún bandeira iha dader no loraik, maibé iha tersa loraik nian mosu oin seluk tanba sira hatún bandeira to’o iha klaran, tali bobar malu metin, book ba mai durante menutu hira nia-laran, entaun sira deside estika makas maibé tanba tali ne’e tinan ida resin ona, habai de’it iha loron no udan laran, tali lahuk no kotu, mak bandeira monu tun maibé la monu ba rai tanba seguransa konsege salva”, Inspetór dehan ba jornalista-sira iha edifísiu MJDAK Lesidere, ohin.
Iha akontesimentu ne’e, parte Polísia Nasionál Timor-Leste (PNTL) no Komisaun Anti-Korupsaun (CAC, sigla portugés) to’o kedan iha fatin hodi foti informasaun.
Inspetór husu ba sidadaun hirak ne’ebé espalla ona video kona-ba bandeira monu ne’e bele hamos hosi media sosiál.
Santos afirma, Ministériu Juventude Desportu no Arte Kultura troka ona Bandeira talin hodi kontinua hasae Bandeira iha dader no hatún iha loraik.
Jornalista: Hortencio Sanchez
Editór : Zezito Silva
