Ekipa Klínika Bairo Pite sei halo ‘’escrening’’ ba moras tuberkuloze iha munisípiu tolu
DILI, 06 jullu 2023 (TATOLI) – Ekipa profisionál saúde husi Klínika Bairo Pite sei halo escrening iha augusto ho objetivu atu halo detesaun sedu ba moras tuberkoloze iha Munisípiu Ermera, Liquisa no Bobonaro.
”Iha fulan oin, Augusto nia-laran sei halo fali escrening iha munisípiu tolu hanesan, Ermera, Bobonaro no Liquisa. Ekipa seluk sei ba tan iha setembru nia-laran ba munisípiu tolu hanesan Aileu, Ainaro no Manufahi hodi buka tuir família pasiente ne’ebé mak moras tuberkoloze hodi halo prevensaun sedu”, Diretór Ezekutivu Klínika Bairo Pite, Inacio do Santos, informa ba TATOLI iha nia kna’ar fatin, ohin.
Nia dehan, moras tuberkuloze hanesan moras ne’ebé bele hadaet husi ema ida ba ema seluk, liuhosi fani ka mear no kuaze sempre afeta ba pulmaun.
”Tuberkuloze ita hotu hatene katak iha Klínika Bairo Pite kobre kuaze um terços kazu nasionál tomak halo tratamentu iha ita-nia fatin”, nia informa.
KBP deteta kada tinan kuaze 500-resin iha 2022, deteta kazu 500-resin mai halo tratamentu iha ne’e, iha 2023 foin mai to’o juñu 300-resin.
Iha juñu, deteta kazu 43 tuberkuloze ne’ebe iha no pozitivu iha 18 ne’ebé halo ona izolamentu iha Tibar, halo izolamentu tanba maioria mai husi foho.
”Depois agora daudaun, ita haree kazu ne’e, mai husi munisípiu sira agora daudaun ita tenke halo edukasaun makas oinsá ita-nia populasaun sira halo prevensaun ba ida ne’e”, nia esplika.
Profisionál saúde sira halo escrining door to door (tama sai uma) iha suku Bairo Pite kompleta ona, populasaun sira iha Bairo Pite hetan ona informasaun bázika kona-ba TBC oinsá sira atu halo prevensaun kona-ba TBC, karik sintoma sira ne’e sira iha koñesimentu hotu ona.
“Agora daudauk hala’o hela iha Postu Administrativu Atabae, Munisípiu Bobonaro hodi eduka ba ita nia populasaun sira oinsá atu halo prevensaun kona-ba TBC, sintoman sinais karik saida atu halo”, nia haktuir.
Ekipa sira ne’e kompostu husi médiku na’in-ida, pesoál saúde na’in-rua inklui tékniku laboratóriu na’in-ida halo hela atividade buka tuir populasaun sira ne’ebé membru família afeta TBC pozitivu iha munisípiu sira, horseik sira iha Manatutu hotu ba fali Baukau, Lospalos no Viqueque iha loron 21 nia-laran sei halo kontatu besik ba pasiente 200-resin iha ne’eba.
Jornalista : Felicidade Ximenes
Editór : Zezito Silva
