Governu Japaun disponibiliza karreta ambúlansia unidade haat ba MS
DILI, 06 jullu 2023 (TATOLI) – Governu Japaun apoiu kareta ambúlansia unidade haat ba Ministériu Saúde (MS) hodi utiliza atu halo asisténsia saúde ne’ebé di’ak ba povu.
“Asisténsia saúde ne’e importante tebes ba ita-nia moris tanba ne’e ho kareta ne’ebé apoiu atu fasilita servisu Ministériu Saúde nian ba povu ho di’ak liután”, Ministru Estadu no Ministru Negósiu Estranjeiru Japaun Takei Shunsuke hateten iha Paláciu das Cinzas, Caicoli, ohin.
Nia kontente haree rasik dezenvolvimentu iha pasífiku ida ne’ebé mak seguru maske ba futuru sei di’ak liután maibé ida ne’e mak Japaun apoiu ba populasaun Timor-Leste.
“Ami apoiu kareta ambúlansia hamutuk ona unidade 42 inklui ekipamentu médiku barak, husi sasan ne’e uza no halo ona atendimentu ba populasaun sira. Ha’u hein katak kareta ambulánsia haat ida ne’ebé mak entrega ohin loron sei utiliza ho másimu no halo atendimentu ba ema ho kualidade”, nia informa.
Iha fatin hanesan, Ministra Saúde Elia Amaral, agradese ba Governu Japaun ne’ebé apoiu ona ambulánsia haat ba povu Timor-Leste.
“Apoiu ida-ne’e hanesan apoiu kontinuasaun hosi Governu Japaun tanba durante Covid-19 ita simu ona ambulánsia hamutuk 38 no ohin ita hetan tan haat ho totál hamutuk 42”,nia konklui.
Jornalista : Felicidade Ximenes
Editór : Zezito Silva
