Top

Komandu PNTL nomea Luis Barreto okupa Adjuntu Kaza Militár

Diretór Jerál SM, Superintendente Asistente Polisia, Luis Barreto,

DILI, 07 jullu 2023 (TATOLI) – Komandante Jerál Polisia Nasionál Timor-Leste (PNTL), Komisáriu Jerál Polísia, Herique da Costa, hateten Komandu PNTL halo nomeasaun foun ba kuadru Ofisiál Superíór PNTL ida atu troka Adjuntu Kaza Militár sesante, Superintendente João Belo ne’ebé mandatu remata ona iha semana kotuk.

Adjuntu Kaza Militár sesante, Superintendente João Belo mandatu remata ona iha semana kontuk no nia entrega ona servisu hanesan Adjuntu Komandante kaza Militár iha Palásiu  Prezidénsia Repúblika iha loron (3/7) foin lalais ne’e.

“Iha ona despaixu nomeasaun ba ita-nia ofisiál no superiór ida ne’ebé mak ba troka fila Superintendente João Belo ne’ebé mak remata ona servisu hanesan Adjuntu Kaza Militár iha ne’eba. Nunee ita nomea ona Superintendente Asistente Luis Barreto hodi ba troka hikas Superintendente Polísia João Belo halo servisu hanesan Adjuntu Kaza Militár nian”, Komisáriu Jerál Polísia, Herique da Costa, hateten ba jornalista sira iha UEP Bairro Pite, sesta ne’e.

Nia dehan, Superintendente Xefe João Belo ema ida ne’ebé mak iha deviza Superintendente ne’e tinan 10-resin ona. Tanba ne’e mak Komandu Jerál presiza nia apoia hodi okupa iha posizaun balun iha Komandu Jerál PNTL.

“Ita hatene katak foin daudaun ne’e ita-nia ofisiál no superiór lubuk ida mak reforma tiha. Entaun vaga sira iha Komandu Jerál mamuk hela, tanba ida ne’e mak nomea fila fali Superintendente Polísia João Belo hodi halo servisu Jerál PNTL”, Herique da Costa adianta.

Komisáriu Jerál PNTL ne’e salienta tanba nesesidade instituisaun Komandu Jerál PNTL Komandu nomea hikas Superintendente João Belo hanesan Xefe Departementu Investigasaun Kriminál iha Komandu PNTL.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!