DILI, 07 jullu 2023 (TATOLI)- Komandante Unidade Espesiál Polísia (UEP), Superentendente Xefe Polísia, Orlando Gomes, hateten, membru UEP Kompostu hosi Batallaun Orden Públiku (UEP), Korpu Seguransa Pesoál (CSP) no Komandu Operasaun Espesiál (COE, Sigla portugés) na’in 100 partisipa atividade desportu treinamentu Taekwondo oinsá atu aumenta tékniku liuliu halo auto-defeza pesoál bainhira halo atuasaun ruma iha terrenu.
“Ita halo koordenasaun ho Embaixadór Corea ho ita-nia esforsu tomak, ohin loron realiza seremónia abertura iha fatin ne’e ne’ebé partisipa hosi membru 100. Ita hatudu ita-nia espesialidade difisiente ho unidade sira seluk katak, UEP mak bele halo treinamentu Taekwondo ida ne’e husi unidade sira seluk labele halo. Treinamentu desportu ida ne’e atu aumenta ita-nia tékniku no tátika no mós abilidade iha luta Defeza pesoál liu husi treinamentu Taekwondo,” Superentendente Xefe Polísia,Orlando Gomes iha intervensaun abertura treinamentu Taekwondo ba membru UEP, iha edifísiu UEP Bairru-Pité, sesta ne’e.
Nia dehan, treinamentu Taekwondo ne’ebé UEP sei kontinua la’ós para de’it ho ema na’in 100 atu nune’e hasa’e tékniku barak liu-liu ba Defeza pesoál nian, hodi aumenta membru sira-nia koñesementu di’ak liu hodi hala’o nia knaar iha terrenu bele garante situasaun ida ne’ebé hakmetek iha rai-laran.
“Komandu PNTL liuhosi UEP planeia hodi envolve membru PNTL hotu ba treinamentu ida ne’e, atu nune’e membru sira bele halo auto-defeza pesoál bé bainhira halo atuasaun para bainhira atu halo servisu Espesiál sira ne’e membru UEP tenke iha espiritu ida katak laiha buat ida ke inposivél, depois iha fíziku forsa ne’ebé ema seluk laiha,” Orlando Gomes afirma.
“Ita-bo’ot sira (membru PNTL) mós prontu atu hasoru dezafiu saida de’it mak mosu iha terrenu tanba ne’e ha’u fiar ho treinu Taekwondo ida ne’e sei bele ajuda no eleva ita-bo’ot sira-nia skill (abilidade) ne’ebé iha ona,” komandante ne’e enkoraja.
Iha fatin hanesan, Embaixadór Korea Súl ba Timor-Leste, Shin Mantek, komprometidu Governu Korea Súl kontinua apoia Timor-Leste iha kualker área no área desportu nian liuliu Taekwondo nian.
“Governu Korea komprometidu nafatin apoiu PNTL no sei apoiu mós ba parte investigasaun kriminál nian tanba PNTL mak mahein diak ba povu Timor-Leste, servisu ho paisaun no dedikasaun tomak ba Timor-Leste,” diplomata ne’e salienta.
Diplomata koreanu ne’e husu ba membru UEP sira atu tuir treinu Taekwodo ho sériu nune’e bele prátika iha futuru lori nasaun no institusaun ba reprezenta iha rai-li’ur.
“Ha’u kontente bainhira imi treinu hotu, hotu-hotu tenke hetan sintu metan no halo rahun batako lima. Tanba ne’e ha’u husu ba imi treinu ida ne’e ho di’ak atu bele hetan skill (abilidade) balun lori hodi defende aan atu nune’e bele ajuda no dezenvolve ita-bo’ot sira-nia abilidade iha futuru oin mai,” nia espera.
Iha fatin hanesan, Komandante Jerál PNTL Komisariu Jerál Polísia, Henrique da Costa hatete onra boot ba PNTL tanba ohin Embaixadór Korea Súl mai abertura treinamentu Taekwondo nian iha resintu Unidade Espesiál Polísia (UEP).
“Embaixadór Korea Súl sai hanesan prontidaun ba Governu Korea Súl hodi fó apoiu mai PNTL iha dezenvolvimentu mai iha instituisaun ida ne’e. Ita hotu asiste Embaixadór Korea Súl entrega ekipamentu mai iha PNTL espesialmente mai iha UEP ho nia estrutura tomak ho responsabilidade tomak atu kuidadu didi’ak ekipamentu hirak ne’e atu nune’e ita hotu bele utiliza ba atividade iha tempu ne’ebé naruk, ami deseju katak, dezenvolvimentu PNTL sei konta mós ho ita-nia apoiu,” Nia dehan.
Autoridade másima PNTL ne’e hateten, treinamentu ba siénsia defeza pesoál ne’e la’ós atu uza halo forsa violénsia maibé siénsia Defeza hanorin atu pasiénsia disiplina tanba iha benefísiu barak hanesan meus ida hodi defende aan no iha fíziku ida ne’ebé saudavél no mós halo ita-nia isin fresku halo ita konfia aan liután no brani halo servisu promove pasiénsia, disiplina hodi kontrola aan.
“Treinamentu Taekwondo ida ne’e atu husu ba ita hotu atu aproveita ho di’ak ha’u husu mós ba Komadante Espesiál no Komandante kompañia sira husu atu nune’e jere ho oráriu didi’ak atu nune’e labele halo nia impaktu ba servisu operasionál nian,” Komisariu Jerál Polísia Herique da Costa husu.
Komandante Jerál PNTL ne’e dezafia membru UEP hodi treinu didi’ak Taekwondo atu bele hetan prestasaun di’ak hodi reprezenta nasaun Timor-Leste tuir kompetisaun oioin.
“Ha’u promete ba imi kuandu imi hetan prestasaun di’ak iha munndu (internasionál) oferese medalla ba Timór Komandu sei atribui buat ne’ebé Komandu iha kuandu imi oferese medalla mak Komandu la fó buat ruma ne’e imi bele ezije ha’u,” Komisáriu Jerál PNTL Henrique da Costa dezafia.
Jornalista : Natalino Costa
Editór : Rafael Ximenes de A. Belo
