DILI, 08 jullu 2023 (TATOLI)- Membru Polísia Nasionál Timor-Leste (PNTL), Unidade Espesiál Polísia (UEP) na’in 66 sei dezloka ba Munisípiu Laútem, Viqueque, Aileu, Ainaro, Manufahi, Covalima, Bobonaro, Baucau, Emera, hodi fó apoiu umanitáriu ba komunidade afetadu dezastre naturál hanesan inundasaun no rai-halai, durante loron tolu desde (iha loron 02 to’o loron 04 jullu ne’e).
“Laiha kbi’it atu fó apoiu sosiál sira hanesan hahan ka la’ós ai-han, maibé, sempre ho prontidaun atu oferese ninia membru sira, tuun bá terrenu, fó apoiu fíziku bá vítima sira, hadi’a sira-ninia uma hela-fatin, bele fila-fali bá normál. PNTL dezloka ita-nia efetivus, hosi Unidade Especial da Polisia nain 66 bá apoiu iha munisipiu sira ne’ebé mak iha loron rua liubá, hetan dezastre naturais,” Komandu Operasaun Nasionál PNTL, Superentendente Xefe Polísia José Soares, informa, ba jornalista sira iha Komandu UEP Bairru-Pité, sábadu ne’e.
Nia dehan, efetivu sira ne’e atu bá fó apoiu atividade sosiál, tanba PNTL laiha kbi’it sira seluk, atu apoiu ekipa sira ne’ebé mak servisu iha terrenu, maibé PNTL oferese emerjénsia.
“Ita-nia forsa laiha atu bele apoiu komunidade sira, iha situasaun kalamidade ida hanesan ne’e, PNTL prontu nafatin, atu bele apoiu komunidade sira iha munisípiu sira, munisipiu sia ne’ebé mak vítima sira hetan afetadu ba dezastre naturál,” Superentendente Xefe Polísia José Soares rekoñese.
Komandante ne’e hatutan, iha kampaña no eleisaun, formasaun governu foun, sira iha situasaun alerta, ne’ebé mak sira esforsa aan tomak, hodi asegura atividade kampaña no eleisaun parlamentár, to’o formasaun Governu.
“Membru sira ne’e bá, atu serbisu hamutuk ho komandu munisípiu, ho mós autoridade relevante sira iha munisípiu, atu bele apoiu vítima sira, karik hadi’a sira-nia uma, ho saida mak iha, ka apoiu sira Institutu Jestaun Ekipamentu ninian, para bele normaliza fali estrada sira,” nia dehan.
Komandu Operasaun Nasionál PNTL, Superentendente Xefe Polisia José Soares, hateten, membru fó mós apoiu seguransa iha munisípiu sira ne’e, para ekipa sira ne’e, bele halo servisu ho di’ak, ne’e para lori fali komunidade sira bá iha situasaun hanesan normál ninian.
“Kada munisípiu, ita koloka ema na’in hitu no ualu ida hanesan ne’e. No, sira termina fali sira-nia servisu iha munisípiu to’o sesta,” Komandante José tenik.
Jornalista: Natalino Costa
Editór : Rafael Ximenes de A. Belo
