DILI, 10 jullu 2023 (TATOLI)—Igreja Protestante iha Timor-Leste (IPTL) husu ba XI Governu atu tau prioridade ba setór tolu hanesan saúde, edukasaun no agrikultura.
Prezidente IPTL, Pastór Domingos Alves, hateten, hanesan uma-kreda sempre apoia orasaun no kontribuisaun nu’udar sidadaun ba Governu.
“Parte igreja iha esperansa katak IX Governu bele halo dezenvolvimentu di’ak, hahú hosi nasionál to’o rurál sira, liu-liu ba setór sira hanesan saúde edukasaun no agrikultura,” Pastór Domingos Alves, relata ba Agência Tatoli, iha igreja Hosana, segunda ne’e.
Notísia relevante : IPTL halo doasaun ran hodi komemora ezisténsia 35 iha Timor-Leste
Parte IPTL husu Governu tau importánsia ba setór tolu ne’e tanba iha nasaun ne’e setór tolu ne’e mak sai preokupasaun povu durante ne’e.
“Dezenvolvimentu nasaun atu la’o presiza edukasaun adekuadu, nune’e mós agrikultura bainhira investimentu la’o maka’as no di’ak ona ita la depedénsia maka’as ba importasaun inklui saúde tenke investe maka’as,” nia akresenta.
Nune’e mós, kona-ba dezempregu iha rai-laran sai ajenda importante ba governasaun foun ida-ne’e.
“Agora ita haree katak ita-nia oan sira sempre halai ba rai-li’ur hodi buka serbisu tanba rai-laran laiha serbisu, ita espera katak Governu bele haree ida-ne’e hotu, hafoin durante loron-120 tanba liu loron ne’e, sira sei halo fali planu tinan-lima nian. Espera ida-ne’e mós inklui ona, maibé hanesan sidadaun mós tenke partisipa saida mak iha atubele la’o hamutuk lori dezenvolvimentu ba rai ida-ne’e,” Pastór Domingos hateten.
Jornalista : Arminda Fonseca
Editora : Julia Chatarina
