Konfrontu iha Lautém, PNTL identifika ona suspeitu na’in-hitu

DILI, 10 jullu 2023 (TATOLI) – Portavós Komandu Jerál Polísia Nasionál Timor-Leste (PNTL), Superintendente Polísia António da Luz, informa Komandu PNTL Laútem identifika ona suspeitu na’in-hitu ba kazu konfrontu ida iha Lospalos ne’ebé rezulta Natalino dos Santos lakon vida.
“Prosesu inisiál halo ona, Komandu PNTL Lautém identifika ona suspeitu na’in-hitu. Maibé ita hein mandadu detensaun hosi Ministériu Públiku atu bele asegura suspeitu sira ne’e hodi partisipa iha prosesu kontinuasaun”, Superintendente Polísia António da Luz hateten ba jornalista sira iha Komandu Jerál PNTL, segunda ne’e.
Suspeitu sira ne’ebé Komandu PNTL Lautém identifika mak hanesan, AVF (21), LE (19), NDJ (18), ANSP (19) MDJ(23) EDJT (19) no JLN (18).
“Sira ne’e hein de’it, kuandu mandadu sai ona mak Komandu Munisípiu Lautém sei halo detensaun ba suspeitu sira ne’e, tanba suspeitu sira ne’e identifika hotu ona”, António adianta.
Kazu ne’e akontese iha loron sesta (7/7) iha eskola Nino Konis Santana iha Lospalos Villa, ne’ebé mosu provokasaun entre estudante ho ema liur, estudante sira to’o lori sai tiha problema ne’e ba liur, entaun iha ne’ebá sidadaun balun ne’ebé mak la’os hosi eskola iha fatin ne’e mak sira mós envolve fila fali.
“Ita haree katak grupu sira ne’ebé mak mai ataka labarik sira iha eskola ne’e, sira ema seluk, sira ne’e mai hosi liur mak asaltu ita-nia alin sira iha eskola, ikus mai ita-nia alin ka oan ida mak hakotu iis”,
Komandu Jerál PNTL forma ekipa invetiga membru ba kazu konfrontu iha Lautém
António da Luz, konfirma katak Komandu Jerál PNTL mós halo ona investigasaun ba membru PNTL sira ne’ebé momenntu halo atuasaun ba konfrontu iha eskola iha Lospalos hodi rezulta Natalino dos Santos mate.
Tanba iha preokupasaun komunidade sira nian katak konfrontu ida ne’e polísia la atua ho profisionalizmu tanba momentu ne’ebá bainhira konfrontu kle’ur mak PNTL to’o tiha fatin maibé labele halo intervesaun rápidu hodi halo prevensaun ba konflitu.
“Hosi Komandu Jerál hasai ona despaixu ba Inspetór Jerál atu kria ekipa ida hodi halo investigasaun ba membru sira iha Lautém kona-ba servisu ne’ebé mak sira halo. Tanba públiku kestiona kona-ba ita (PNTL) nian atendimentu ne’ebé halo iha momentu akontesimentu ne’e”, nia dehan.
Tanba ne’e, Komandante Jerál hasai ona despaixu ba Inspetór Jerál atu bele kria ekipa ne’ebé kompostu hosi Inspetór Jerál hosi parte investigasaun no mós parte justisa atu halo prosesu investigasaun ba membru sira iha Lautém ne’ebé momentu halo atuasaun ba konfrontu ne’e.
Jornalista: Natalino Costa
Editór : Zezito Silva

