Komandu PNTL fó posse ba Ofisiál no Superiór 12

DILI 12 jullu 2023 (TATOLI) – Komandu Polísia Nasionál Timor-Leste (PNTL) nomea no fó posse ba Ofisiál no Superiór na’in-12 hodi asume fali kargu hirak ne’e nu’udar responsabilidade ida hodi servi povu no nasaun.
Elementu PNTL hirak ne’ebé simu pose mak Superintendente Polísia João Belo dos Reis substitui Superintendente Asistente Luis Barreto hodi lidera Departamentu Investigasaun Kriminál (DIK). Superintendente Asistente Basilio de Jesus nomeadu ba Segundu Komandante Unidade Espesiál Polísia (UEP) hodi troka Superintendente Polísia Damião Silva.
Superintendente Polísia Calisto Gonzaga substitui Superintendente Asistente Basilio hodi lidera Komandu PNTL Covalima. Superintendente Polísia João da Cosa hetan fiar hodi troka Komandante Munisípiu Viqueque, Superintendente Polísia Sebastião Quintão.
Superintendente Asistente Domingos Grigorio Soares troka Superintendente Polísia Inacio dos Santos iha Manatutu, Superintendente Sebastião Alves Quintão nomeadu hodi lidera Komandu Munisípiu Aileu. Superintendente Asistente Silveiro de Araujo nomeadu sai komandante tránzitu nasionál no Superintendente Polísia Damião Silva Komandante Unidade Espesiál (UEP) troka Superintendente Xefe Orlando Gomes, enkuantu Orlando Gomes nomeadu hodi substitui Superintendente Xefe Natercia Martins hodi lidera Komandu Munisípiu Dili no Superintendente Polísia Natercia Martins lidera fali Komandu Administrasaun.
“Ohin ita realiza serimónia ida ne’e, hodi priénse mós kargu ka estrutura ne’ebé mak durante ne’e mamuk, halo mós rotasaun atu bele iha ambiente (enviroment) foun ida, atu bele implementa servisu ne’ebé di’ak iha fatin ne’ebé foun ho di’ak liután”, Komisáriu Jerál Polísia, Henrique da Costa, hateten ba jornalista bainhira nomea no fó pose ba Ofisiál no Superíor PNTL na’in-12 hodi priénse estrutura Komandu PNTL nian, hahú hosi Komadante Munisípiu no Komandante Unidade sira ne’ebé hala’o iha Komandu Jerál PNTL Caicoli, kuarta ne’e.
Henrique da Costa esplika, desizaun Komandu PNTL nian mak halo promosaun, nomeasaun no rotasaun, ne’e buat ida normál, akontese iha nasaun ne’ebé de’it no akontese iha instituisaun ne’ebé de’it.
Nia afirma, rezutadu hosi reforma ne’e fó oportunidade ba ema sira seluk hodi okupa kargu sira ne’ebé mamuk no bele mós loke oportunidade ba promosaun iha futuru.
“Ha’u hakarak apela ba komandante sira ne’ebé mak ohin hola posizaun ka tomada pose ba kargu no nomesaun ne’ebé mak ita bo’ot sira simu hanesan konfiansa hosi intituisaun liuhosi Komandante Jerál no Segundu Komandante Jerál, atu bele asegura desizaun komandu nian depois implementa servisu iha terenu ho responsablidade”, Komisáriu Jerál PNTL refere.
Henrique da Costa dezafia ba emposadu sira atu halo tuir juramentu, respeita responsabilidade servisu no kumpre tuir lei ne’ebé mak iha, .
“Lei sai hanesan ninian legalidade bainhira ita halo servisu”, nia konklui.
Jornalista: Natalino Costa
Editór : Zezito Silva

