MJ prioriza kapasitasaun ba guarda prizionál
DILI, 12 jullu 2023 (TATOLI) – Ministru Justisa (MJ) Amandio de Sá Benevides, hateten sei tau prioridade hodi kapasita rekursu umanu liuliu ba guarda prizionál sira atu bele eleva liután kapasidade servisu.
“Guarda prizionál sira, ita presiza kapasita sira liuhosi formasaun oioin atu hasa’e sira-nia kapasidade, hodi servisu ho di’ak liután”, ministru dehan ba jornalista sira iha Palásiu Governu, kuarta ne’e.
Nia dehan, formasaun guarda prizionál durante ne’e sei menus ho nune’e mak XI Governu tau mós prioridade.
“Maibé programa hotu ita sei haruka ba Parlamentu Nasionál hodi diskute, bainhira liu ona mak ita sei implementa”, nia dehan.
Nia afirma, uniforme ba Guarda Prizionál sira ne’ebé konsidera tuan los ona mak sei rezolve maibé sei haree mós ba kondisaun.
“Kona-ba fardamentu ba sira ida ne’e importante hotu maibé importante liu mak sira-nia kapasidade no kbiit hodi halo servisu ho di’ak”, ninistru ne’e relata.
Tuir dadus ne’ebé iha, totál membru Guarda prizionál hamutuk 207 mak destaka hodi fó seguransa ba prizioneiru sira iha Prozaun Becora, Gleno no Suai.
Jornalista: Hortencio Sanchez
Editór : Zezito Silva
