Assanami ho MJDAK reune ho lider PSHT
DILI, 13 jullu 2023 (TATOLI) – Vise Primeiru-Ministru no Ministru Kordenadór ba Asuntu Dezenvolvimentu Rurál Mariano Assanami Sabino hamutuk ho Ministru Juventude Desportu no Arte Kultura (MJDAK) Nélio Isaac Sarmento hasoru malu ho lider organizasaun Persaudaraan Setia Hati Terate (PSHT) hodi ko’alia kona-ba nesesidade organizasaun nian ne’ebé Governu atu ajuda no husu atu koopera ho Governu atu kontribui ba dezenvolvimentu nasaun.
“Governu ida ne’e iha nia programa atu transforma desportu ne’ebé entre internál no externál atu promove no prepara atleta ne’ebé di’ak”, Assanami dehan ba jornalista sira iha edifísiu MJDAK Lecidere, kinta ne’e.
Assanami hatutan, reuniaun ne’e la’os de’it ho PSHT maibé sei envolve mós Organizasaun Arte Marsial (GAM) hotu iha Timor-Leste hanesan, Ikata Kera Sakti (IKS), Kmanek Oan Rai Klaran (KORKA) no seluk tan.
“Ohin ita hahú ho PSHT, ba oin sei kontinua tan ho KORK, IKS no seluk tan atu rona sira nia hanoin, oinsa mak Governu bele tulun sira no sira bele kria paz no estabilidade atu kontribui ba dezenvolvimentu nasaun nian”, Assanami dehan.
Iha sorin seluk MJDAK Nélio Isaac reforsa tan katak reuniaun ne’e atu hare organizasaun nia problema, difikulade no saida mak presiza Governu apoiu sei apoiu atu prepara organizasaun GAM hotu atu prepara atleta ne’ebé ho kualidade labele kria konflitu iha nasaun ne’e.
“Ita sei bolu organizasaun hotu atu ko’alia ba sira, atu profisionaliza sira-nia organizasaun liu hosi programa ne’ebé mak ita sei aprezenta ba Parlamentu atu halo apresiasaun”, Nélio adianta.
Tanba ne’e, nia agradese ba PSHT ne’ebé kumpre konvite Governu nian hodi partisipa iha sorumutuk ne’e.
Iha sikun seluk, Sekretáriu Jerál PSHT Pedro Aparicio hateten, enkontru ne’e importante tebes tanba Governu bele bolu sira atu rona ideia balu no husu organizasaun atu hadia aan liután atu labele kria tan konflitu iha nasaun ne’e.
“Ami kontente tebes tanba Governu nafatin komprende ami-nia situasaun, Governu ida ne’e trata ami di’ak hanesan mós Governu anteriór, sira nafatin suporta amu atu hala’o atividade”, Pedro dehan.
Ho konfiansa Governu nian ba PSHT, nia apela ba membru hotu atu nafatin kria paz iha nasaun ne’e atu kontribui ba dezenvolvimentu nasaun nian.
Jornalista: Hortencio Sanchez
Editór : Zezito Silva
