Governu presiza fó prioridade programa ba sentru formasaun
BAUCAU, 13 jullu 2023 (TATOLI) – Sentru Dezenvolvimentu Komunitária (CDC, sigla portugés) husu Governu atu kria programa hodi fó prioridade ba sentru formasaun sira hodi prepara traballadór profisionál iha Timor-Leste.
Diretór CDC, Vicente Belo, esplika, nu’udar parseiru dezenvolvementu lokál iha Baucau prontu apoia no koopera liuliu atividade inklui programa hosi governu atuál liuliu kontinua programa no hadi’a diak liután governu anteriór halo ona.
“Husu governu hadi’a fali prograrma sira ne’ebé governu anteriór halo ona, kompleta di’ak liután no futuru bele iha koneksaun ba malu hodi fasilita formandu sira nune’e iha oportunidade atu asesu ba kampu traballu iha rai-laran no li’ur,” Diretór Sentru Dezenvolvementu Komunitária informa ba Agência TATOLI iha Vila Antiga, kinta.
Programa ne’ebé presiza fó prioridade mak ajuda orsamentu ba sentru formasaun sira liuhosi fundu regulár ba kada sentru akredita, reforsa institusionál no kontinua apoia formasaun movel inklui konstrusaun infraestrutura.
Vicente Belo, argumenta, karik bele iha mundansa ba kargu jestór sira maibé inportante mak iha liña koordenasaun atu hamutuk trasa planu ba programa prioridade hodi implementa durante mandantu tinan-lima mai.
“Liuhosi sorumutu ho kada sentru sira bele rejista atu sai ba programa, ami rekomenda atu apoia fundu hodi instala fatin manufatua fini tomate iha futuru,” Vicente Belo akresenta.
CDC rekomenda atu SEFOPE hala’o vizita ba kada sentru hodi haree direita kondisaun no apoia fundu ba infraestrutura hodi konstrui tán fatin toba ba formandu sira-ne’ebé hosi munisípiu seluk hodi fasilita durante períodu kursu.
CDC Baucau nu’udar sentru formasaun ba agrikultór no lian Korea rejista formandu hamutuk na’in-52 no finaliza ona estájiu iha terenu inklui hahú loke rejistrasaun foun ba peridu daruak tinan-2023 nian.
Jornalista : Natalino Belo
Editór : Evaristo Soares Martins
