Membru foun PSHT hamutuk 10.538 sei gradua iha agostu
DILI, 13 jullu 2023 (TATOLI) – Sekretáriu Jerál Organizasaun Persaudaraan Setia Hati Terate (PSHT) Pedro Aparicio, informa iha ona dadus konkretu ba membru foun hamutuk 10.538 ne’ebé mak sei gradua iha agostu tinan ida ne’e.
“Agostu ita sei halo graduasaun ba membru foun hamutuk 10.538 mak sei tuir graduasaun, ami preparadu no Governu mós sei ajuda ami iha parte seguransa nian”, Pedro dehan ba jornalista sira iha edifísiu Ministériu Juventude Desportu no Arte Kultura (MJDAK) Lecidere, kinta ne’e.
Nia dehan, prosesu graduasaun ba tinan ida ne’e sei kontinua hala’o hanesan tinan 2022 nian, fahe kada rejiaun hanesan Baucau, Manufahi, Covalima Dili no Bobonaro.
“Graduasaun sei halo hanesan tinan kotuk de’it, fahe tuir rejiaun tanba membru barak demais, ami kontente los tanba Governu ida ne’e nafatin apoiu ami atu realiza graduasaun ba membru foun sira”, Sekretáriu Jeral afirma.
Iha fatin hanesan, Ministru Juventude Desportu no Arte Kultura (MJDAK) Nélio Isaac Sarmento, hateten Governu nafatin fó apoiu másimu ba organizasaun PSHT atu hala’o atividade livre iha nasaun ne’e.
“Graduasaun ne’e sira PSHT mak sei halo, Governu prontu apoiu másimu nafatin ba sira-nia atividade saida de’it, ita nafatin asegura seguransa ba sira atu mantein paz no estabilidade”, nia konklui.
Jornalista: Hortencio Sanchez
Editór : Zezito Silva
