DILI, 13 jullu 2023 (TATOLI) – Ministru Juventude Desportu no Arte Kultura (MJDAK) Nélio Isaac Sarmento akompaña hosi Embaxadór Korea Súl iha Timor-Leste Kim Jeong Ho, observa direta konstrusaun Kampu Futeból Becora, Bintang Bidau, Kampung Alor no Comoro hodi haree direta servisu iha terenu.
“Ha’u mai vizita kampu ida ne’e no kampu balu tan tanba hahú konstrusaun iha tinan kotuk, ne’e mak hakarak mai haree fali nia andamentu to’o iha ne’ebé hamutuk ho embaxadór, haree progresu servisu la’o di’ak tebes”, Nélio dehan ba jornalista sira iha Kampu Becora, kinta ne’e.
Governante ne’e dehan, bainhira projetu ne’e konklui, Timor-Leste bele iha ona infraestrutura, entaun konsentra ba atleta sira hanesan fini ba nasaun nian.
“Tanba ne’e ita agradese ba Governu Korea liuhosi Embaxadór ne’ebé mak hakarak dezenvolve tebes ita-nia nasaun liuliu desportu, projetu Korea nian la’os ba kampu ida Becora de’it, sei iha tan kampu Bintang Bidaun, kampo Kampung Alor no Comoro ne’ebé ohin loron ha’u sei ba vizita hotu”, governante ne’e dehan.
Nia adianta, tuir estimasaun ne’ebé iha, konstrusaun ba kampu haat ne’e sei konklui iha marsu 2024 tinan oin.
Iha fatin hanesan, Embaxadór Korea Súl iha Timor-Leste Kim Jeong Ho, informa projetu ne’e atinje ona 34%.
“Projetu ne’e la’o di’ak tebes, agora daudaun atinje ona 34%, kompaña garante mai ami katak sei finaliza obra ne’e tuir kontratu ne’ebé iha, nune’e tinan oin, iha marsu konstrusaun remata”, embaxadór afirma.
Embaxadór ne’e promete sei esforsu makas hodi servisu hamutuk ho kompaña atu bele finaliza lalais obra ne’e.
Konstrusaun ba kampu haat ne’e ho pakote ida ho orsamentu hamutuk millaun $2.4, ne’ebé kaer hosi kompaña CHLN Timor Unipesoal Lda ho traballadór hamutuk 150-170 kada kampu ida. Orsamentu ida ne’e apoiu hosi povu no Governu Korea Súl atu ajuda Timor-Leste nia dezenvolvimentu.
Jornalista: Hortencio Sanchez
Editór : Zezito Silva
