DILI, 13 jullu 2023 (TATOLI) – Komandante Jerál Polísia Nasionál Timor-Leste (PNTL) Komisáriu Jerál Polísia Henrique da Costa, Departamentu Investigasaun Kriminál (DIK) enkamiña ona rezultadu hosi prosesu identifikasaun ba sidadaun na’in-rua ne’ebé ho konta facebook diferente ne’ebé ofende Primeiru-Ministru Xanana Gusmão ba Ministériu Públiku (MP).
“Ita-nia Departamentu Investigasaun Kriminál bolu hodi halo identifikasaun no rezultadu identifikasaun mak enkamiña ona ba Ministériu Públiku”, Henrique dehan ba jornalista sira hafoin ramata vizita ba sede RENETIL, Farol, kinta ne’e.
Nia afirma, iha nasaun demokrátika, ema hotu iha Liberdade maibé tenke ho responsabilidade perante lei.
“Ita iha liberdade la signifika ita ne’e sees hosi lei, ne’e labele. Kuandu ema ida hetan ameasa no sente la seguru, ida ne’e polísia nia servisu, tenke tama hodi halo intervensaun”, Henrique salienta.
Nia esplika, kuandu sidadaun ne’ebé mak lansa informasaun ho natureza ameasa, ida ne’e PNTL nia obrigasaun atu bolu hodi halo identifikasaun.
Nia hateten, PNTL la haree ba sé de’it, nia ne’e lider ka la’os, maibé polísia halo tratamentu ne’ebé hanesan ba ema hotu.
“Kuandu iha ID ida mak ameasa ema ida iha rede sosiál, favór informa ba polísia atu polísia bolu hodi halo identifikasaun”, nia konklui.
Rekorda fali katak Departamentu Investigasaun Kriminál (DIK), ka’er ema na’in-ida ho konta facebook ho naran Ela Variana no Jonn Malik tanba lansa liafuan ne’ebé ofende Primeiru-Ministru, Xanana Gusmão.
Jornalista: Natalino Costa
Editór : Zezito Silva
