Governu sei halo revizaun estatutu PNTL hodi dignifika membru reformadu 158

DILI, 14 jullu 2023 (TATOLI) – Ministru Interiór (MI), Francisco Guterres, hateten Ministériu Interiór (MI) sei halo revizaun ba estatutu Polísia Nasionál Timor-Leste(PNTL) inklui diploma legal sira iha institutusaun polísia atu bele dignifika membru PNTL sira inklui membru 158 ne’ebé reformadu.
“Ita sei halo revizaun totál ba lei no diploma legál sira iha PNTL laran, hahú hosi sira-nia karreira, rejime salariál para depois sira bele dezempeña sira-nia papél ne’e ho di’ak”, Francisco Guterres, hateten ba jornalista sira hafoin remata vizita ba Kuartél Komandu Jerál PNTL, Caicoli, sesta ne’e.
Governante ne’e hateten, presiza halo revizaun ba kestaun legál iha PNTL atu nune’e fó tratamentu ba membru PNTL sira liuliu karik kria kondisaun, bainhira sira tama reforma.
Nia revela, membru PNTL sira ne’e importante, treinadu no Estadu investe sira barak tanba ne’e kuandu membru ida atu reforma presiza kria kondisaun ba sira. hanesan membru reformadu na’in-158 oinsá Governu trata sira valoriza sira ho di’ak molok pasa ba reforma.
“Ita sei halo revizaun ba estatutu PNTL atu bele dignifika sira ne’ebé reforma, ida ne’e tama hotu ona ami-nia planu atu halo ida ne’e”, Francisco haktuir.
Iha fatin hanesan, Komandante Jerál PNTL, Komisáriu Jerál Henrique da Costa, hateten hanesan Komandante Jerál apoia ba planu no programa Minsitériu Interiór atu halo revizaun ba rejime karreira no rejime salariál ba PNTL.
“Governu halo revizaun ba rejime salariál PNTL ne’e di’ak. Hadia saláriu báziku ba PNTL di’ak liu dúke ida subsídiu. Ministru interiór hakarak aumenta saláriu báziku ba PNTL ita tenke agradese ida ne’e”, nia dehan.
Henrique kontinua dezafia ba komadante munisípiu sira no membru sira hotu atu kontinua presta servisu di’ak liután iha terenu liuhosi mellora atendimentu públiku liuliu ba komunidade sira.
“Governu nia atensaun ba ita kontinua iha, mak ita bo’ot Governu atu hadia rejime salariál ba PNTL, ho ida ne’e atu motiva ita atu oferese servisu ne’ebé di’ak liután ba ita-nia komunidade sira”, Komisariu Jerál PNTL hateten.
Jornalista: Natalino Costa
Editór : Zezito Silva

