DILI, 14 jullu 2023 (TATOLI) – Sekretáriu Jerál Federasaun Karate-do Timor-Leste (FKTL), Antonio Carlos de Araujo, dehan kompetisaun iha Asian Games ne’ebé sei akontese Xina, iha fulan setembru, Timor-Leste prepara ona atleta na’in-tolu.
“Kona-ba Asian Games nian, ita prepara atleta na’in-tolu mak sei ba kompete, agora daudaun ita nia preparasaun másima tebes ho preparasaun hanesan ne’e ita sei hatudu rezultadu ruma”, Antonio dehan ba Agência Tatoli, sesta ne’e.
Nia subliña, atleta na’in-tolu ne’e mane hotu, sira mak hanesan Julio da Silva Kefi sei joga iha 60kg, Dionisio Kefi sei joga iha 67kg no Jacob Almeiro sei joga iha menus 75kg, daudaun ne’e atleta sira hala’o treinamentu iha Delta Dili, hahú segunda to sábadu iha dader no loraik.
Rekorda fali katak iha semana kotuk, Konfederasaun Desportiva Timor-Leste (CDTL-sigla portugés) liuhosi reuniaun ho membru sira deside ona modalidade hamutuk sia mak sei ba kompete iha Asian Games 2023.
Modalidade sia ne’e mak hanesan Federasaun Atletizmu Timor-Leste(FATL), Federasaun Tiru Timor-Leste (FTTL), Federasaun Voleiból Timor-Leste (FVTL), Federasaun Badminton Timor-Leste (FBTL), Federasaun Taekwondo Timor-Leste (FKTL), Federasaun Boxe Amadora Timor-Leste (FBATL), Federasaun Hit-Besi Timor-Leste (FHTL), Federasaun Natasaun Timor-Leste (FNTL) no Federasaun Karate-Do Timor-Leste (FKTL).
Jornalista: Hortencio Sanchez
Editór : Zezito Silva
