DILI 16 jullu 2023 (TATOLI)–Xefe Departementu Tranzitu Seguransa Rodoviáriu Nasionál, Superientendente Asistente Polísia, Luis da Costa, hateten PNTL sei la tolera motorista sira para viatura iha arredór Palasiu Governu no Parlementu Nasionál nia oin, tanba konsidera fatin rua ne’e proividu atu para karreta no motorizada iha ne’e.
Notísia Relevante: Polísia Tránzitu Bandu Funsionáriu Para Motorizada iha Arredór Palásiu Governu
“Bainhira ha’u simu toma pose hanesan Komandante Tranzitu Seguransa Rodoviáriu Nasionál, iha kinta no sesta foin daudun, ita hahú halo operasaun hodi bandu motorista sira labele para viatura iha arredór Palasiu Governu no mós para iha Parlamentu nia oin,” Luis da Costa hateten ba Agência TATOLI iha nia kna’ar fatin Komandu Jerál PNTL, domingu ne’e.
Nia esplika, bainhira iha motorista mak kontinua para karreta no motorizada iha fatin rua ne’e sei aplika multa, tanba motirsta sempre para viatura iha trotoar leten iha Palasiu Governu nian inklui iha Parlamentu Nasionál nia oin.
“Ita kompara ho nasaun sira seluk, Palasiu Governu no Parlamentu ne’e mais importante no labele para rungu-ranga hanesan ne’e. Tanba ne’e, ita hetan konfiansa, itu haree ida-ne’e no ita rezolve atu haruka sira hamamuk tiha fatin ne’ebá, hodi normaliza arredór Palasiu Governu ho Parlamentu ho intensaun katak, ita-nia Palasiu Governu ita-nia Parlementu Nasional ne’e ita tenke fó onra,” nia dehan.
Komandante ne’e hateten, sei destaka nia membru iha Palasiu Governu no Parlamentu Nasionál perante fulan ida atu kontrola ema evita labele para transporte privadu no Governu labele para arbiru iha arredór Palasiu Governu no Parlamentu Nasionál oin.
Ba oin PNTL sei la nonook no sei kontinua halo operasaun boot liután iha kapitál hodi regula transporte públiku labele para viatura iha trotoar leten inklui vendedór sira-ne’ebé faan sasán iha trotoar leten.
Tanba, dala barak negosiante Xineza sira tantu maluk negosiante sira seluk uza trotoar ne’e hodi halo negosiu ne’e labele, tuir lolos trotoar ne’e espasu ema atu la’o la’ós atu okupa hodi faan, maibé bainhira akontese beibeik mak PNTL sei aplika regra.
“Trotoar ne’e ita uza atu la’o ain, la’ós ba fali ba iha fatin negosiante atu faan sasán. Se ami hetan ida-ne’e, ita sei aplika lei. Tuir lei tranzitu númeru 6/2003, ne’e la autoriza. Kuandu iha ita aplika multa, ida-ne’e mak ita sei haree ba oin,” nia dehan.
Tanba ne’e, tempu badak nia laran,sei aprezenta planu operasaun ba Komandu Jerál PNTL hodi hahú halo operasaun ba fatin ne’ebé agora daudaun Departementu Tránzitu no Seguransa Rodoviaria Nasionál identifika hanesan fatin ne’ebé hamosu egrafámentu iha Díli laran, ema uza trotoar hodi halo negosiu no inklui fatin faan motór no karreta.
“Ita ekontru ona ho estrutura tránzitu nasioál,I ta identifika pontu hamosu engarafámentu, ema faan karreta privadu siran depois atividade negosiu faan sasán mai to’o estrada ita identifika hotu ona. Depois, ita halo planu opersaun oinsá para ita normaliza fila-fali trotoar ne’e ba ema la’o ain no estrada ne’e uza ba karreta ho motór,” nia hateten.
Nia hateten, planu opersaun ne’e nia parte sei diskute hamutuk ho Komandante PNTL Munisipiu Díli, tanba Díli ne’e pretense ba área jurisdisaun Komandu PNTL Díli molok aprezenta ba Komandu Jerál hodi hahú vijilansia.
Jornalista : Natalino Costa
Editór : Cancio Ximenes
