TIC Timor, I.P sei hala’o sensibilizasaun programa Identidade Úniku ba autoridade Baucau
DILI, 16 jullu 2023 (TATOLI)—Ajénsia Tekólojia Informasaun no Komunikasaun, Institutu Públiku (TIC Timor, I.P, sigla portugés) liuhosi Ekipa Identidade Únika kontinua hala’o atividade soensibilizasaun kona-ba implementasaun Programa Identidade Úniku ba autoridade sira iha postu administrativu neen, munisípiu Baucau.
Nota komunikadu ne’ebé Agência Tatoli asesu, domingu ne’e, hateten objetivu hosi sesnibilizasuan ne’e atu hatutan informasaun ba autoridade lokál sira kona-ba saida mak identidade únika no nia benéfisiu sira bainhira implementa ona programa refere.
Autoridade hosi postu administrativu neen ne’ebé sei tuir programa identidade úniku mak hanesan postu administrativu Baucau Vila, Laga, Baguia, Quelicai, Venilale, no postu administrative Vemasse.
Tuir ajenda, sensibilizasaun IDÚ rasik sei hala’o iha loron 18 jullu 2023 iha postu administrativu Baucau Vila, loron 19 jullu hala’o iha postu administrativu Laga, 24 jullu iha Baguia, loron 25 jullu iha Quelicai, loron 26 jullu iha Venilale no loron 27 jullu l iha postu administrativu Vemasse.
Iha atividade sosializasaun ne’e, sei loke diretamente hosi Prezidente Autoridade Munisípiu Baucau, Olivio Freitas “Bou-Lesa” bainhira hala’o iha Postu Baucau Vila no akompaña hosi Diretór Ezekutivu TIC TIMOR, I.P lihosi online no aleinde ne’e administradór postu administrativu sira sei loke atividade sensibilizasuan iha kada postu ida-idak nian.
Atividade ne’e ,iha aprezentasaun Jornada implementasaun hosi Diretór Identidade Úniku, Florindo Guterres da Costa, ba matéria sensibilizasaun programa IDÚ sei aprezenta hosi Koordenadór komunikasaun-IDÚ, Diogo de Jesus Carvalho.
Ba sensibilizasaun Programa identidade úniku iha postu administrativu neen sei hetan partisipasaun hosi Prezidente Autoridade munisipál Baucau, Administradór Postu Adminstrativu, Xefe Suku, Xefe Aldeia, Xefe Administrasaun Lokál, Xefe Finansa Lokál, Xefe Planu no Dezenvolvimentu Lokál, Xefe Dezenvolvimentu Komunitáriu Lokál, Reprezentante Tékniku Setorál ministériu sira, PNDS, teprezentante saúde no deguransa postu sira no ajente administrasaun destakadu sira.
Ekipa sosializasaun ba programa identidade úniku hamutuk ema na’in-lima no sei hetan partisipasaun masimu hosi reprezentante sira iha postu administrativu ho totál 70.
Enkuantu, antes ne’e, TIC TIMOR, I.P liuhosi Dirasaun Identidade Úniku mós halo ona sosializasaun ba parseiru dezenvolvimentu sira hanesan Ministériu sira, Universitáriu no entidade relevante sira seluk, nomós hala’o ona sensibilizasaun ba munisípiu balun hanesan iha postu administrativu sira iha munisípiu Liquiça, Ermera, Ainaro, Aileu no Lautém, inkui Eskola Sekundáriu sira no Rejiaun Aadministrativa Espesiál Oé-Cusse Ambeno (RAEOA).
Ekipa Identidade Úniku mós halo ona aprezentasaun ba Prezidente Autoridade Munisipál sira no Administradór Munisipál sira iha Reuniaun Konsellu Koordenasaun Teritóriál (KKT) iha munisiípiu Lautém no sei kontinua ba munisípiu sira seluk.
Jornalista : Arminda Fonseca
Editór : Cancio Ximenes
