BAUCAU, 17 jullu 2023 (TATOLI) – Autoridade suku Buruma, postu administrativu Baucau Vila, rekomenda IX Governu revee matadalan implementasaun Programa Mão de Obra Postu Administrativu (PMOPA) nune’e foka ba atividade produtivu.
Xefe suku Buruma, Libório dos Santos Freitas, esplika, maske programa refere ho objetivu rekupera ekonomia komunidade, maibé atividade atuál tuir matadalan hanesan limpeza ho reparasaun estrada laiha sustentabilidade ba komunidade iha suku.
“Vantajen hosi programa ne’e laiha sustentabilidade tanba remata iha momentu implementasaun tanba ne’e husu atu revee ho intensaun atu badinas serbisu,” Xefe suku Buruma informa ba Agência TATOLI iha Vila Antiga, segunda ne’e.
PMOPA tinan-ne’e faze dahuluk finaliza ona liuhosi atividade tolu hanesan hamoos mini irrigasaun, reparasaun estrada no limpeza iha arreador sede suku.
Atividade refere envolve traballadór informál hamutuk na’in-40 fahe ba grupu rua, komposta hosi limpeza irrigasaun inklui reparasaun estrada no na’in-20 responsável ba atividade limpeza arreadór sede suku durasaun serbisu loron-sia, ne’ebé kada loron traballadór sira direitu $5.
“Suku la halo pagamentu maibé prepara traballadór atu serbisu,” Libório Freitas akresenta.
Tuir planu autoridade suku Buruma sei kontinua PMOPA faze daruak liuhosi atividade konstrusaun moru hodi halo protesaun ba bee-matan iha suku refere bainhira sorumutu reuniaun konsellu postu.
Postu Baucau Vila sei hetan alokasaun orsamentu hamutuk rihun $100 ne’ebé aloka ba kustu operasionál rihun $5 no kustu atividade rihun $95, ne’ebé fahé ba suku 11 ho atividade faze rua no sei envolve traballadór hamutuk 931.
Totál orsamentu PMOPA ne’ebé aloka ba munisípiu Baucau tinan-2023 hamutuk rihun $600, kada postu administrativu rihun hetan alokasaun $100, komposta hosi kustu operasionál pursentu 5, kustu atividade pursentu 95 no sei envolve traballadór informál 5.588.
Jornalista : Natalino Belo
Editór : Evaristo Soares Martins
