Estudante UNTL na’in-91 hala’o estájiu iha Baucau

BAUCAU, 18 jullu 2023 (TATOLI) – Universidade Nasionál Timor Lorosa’e (UNTL) liuhosi fakuldade edukasaun, arte no umanidade dzloka estudante hamutuk na’in-91 hodi hala’o estájiu iha munisípiu Baucau.

Magnifiku Reitór UNTL, João Soares Martins, esplika, estudante hirakne’e hala’o prátika pedagójika durante fulan-neen iha atu hatoman ambiente ensinu no transmite siénsia bá estudante iha baze inklui hetan esperiénsia foun.

“Objetivu estajiadu atu sira hatoman ambiente ensinu nian, oinsá sira transmite siénsia ba estudante no sira bele hetan esperiénsia foun,” Magnifiku Reitór UNTL hateten iha salaun Ima dame Vila Nova, tersa ne’e.

Nune’e reitór husu atu estudante universitáriu hirak-ne’e presiza aproveita oportunidade di’ak durante estájiu Baucau tanba alende prátika pedagójika maibé nu’udar oportunidade atu kria amizade ho manorin sira.

“Estajiáriu sira tenke aproveita tempu nune’e bele hetan esperiénsia fulan-neen durante estájiu iha Baucau,” João Martins akresenta.

Diretór Servisu Munisipál Edukasaun Baucau, Augosto Ornai Ximenes, hateten, durante hala’o estájiu estudante hirak-ne’e sei hetan asisténsia kontrolu hosi servisu munisipal edukasaun iha kada eskola nune’e bele sai manorin futuru.

“Ita kontrola nune’e prepara sira ho di’ak, tanba futuru sira mak profesór troka profesór sira-ne’ebé idade reforma,” Augosto Ximenes argumenta.

Jornalista    : Natalino Belo 

Editór          : Evaristo Soares Martins