Top

Komandu PNTL rekoñese susar kontrola liña fronteira hosi atividade ilegál

Portavós Komandu Jerál PNTL, Superintendente Polisia, António da Luz. Imajen /Tatoli

DILI, 18 jullu 2023 (TATOLI) – Portavós Komandu Jerál Polísia Nasionál Timor-Leste (PNTL), Superintendente Polísia, António Luz, hateten Komandu PNTL rekoñese difisíl atu halo kontrolu ba atividade illegal ne’ebé la’o iha zona fronteirisa tanba rekursu ne’ebé mak komandu koloka mak sei menus.

Nia dehan, Unidade Patrollamentu Fronteira (UPF) no Unidade Polísia Marítima (UPM), hatudu servisu ne’ebé másimu maibé liña fronteira ne’ebé mak luan tebe-tebes.

“Entaun ho membru ne’ebé mak limitadu, fasíl tebes fó fatin ba ema atu halo atividade ilegál sira”, António Luz  hateten ba jornalista sira iha Komandu Jerál PNTL Caicoli, tersa ne’e.

António esplika, atu haforsa seguransa iha liña fronteira, kabe ba komandu jerál atu bele koloka tán rekursu balun tán no ekipamentu ba membru sira atu bele fasilita hodi hala’o servisu di’ak liu.

“Ita hatene katak iha fronteira, iha postu barak ho distánsia ne’ebé mak dook no luan tebes, entaun presiza tán membru UPF barak atu bele servisu. Ha’u hanoin Komandu PNTL iha planu atu bele haree ida ne’e, oinsa reforsa ita-nia fronteira”, nia dehan.

Nia husu ba Governu atu tau konsiderasaun ba limitasaun rekursu umanu ne’ebé sei menus iha área fronteira, tanba atu prevene atividade ilegál no movimentu ilegál iha fronteira presiza rekursu umanu atu fortifika seguransa iha zona fronteira.

“Espera katak tinan oin iha rekrutamentu hosi Governu hodi tau orsamentu atu bele aumenta rekursu ne’ebé mak agora sei menus”, nia adianta.

“Tanba liuhosi ida ne’e mak ita bele reforsa servisu iha liña fronteira, la’os rekursu umanu de’it maibé presiza mós rekursu materiál sira para bele apoiu ita-nia membru sira, halo servisu”, nia reforsa.

Maske nune’e, komandu kontinua esforsu hodi orieta nafatin ba membru sira halao servisu nafatin, halo servisu ho loloos, hala’o servisu ho responsablidade.

Nia mós husu ba parte hotuhotu liuliu komunudade sira ne’ebé mak hela iha liña fronteira atu apoia hodi servisu hamutuk ho autoridade polisiál nian, karik hatn informasaun ruma bele informa ba parte polísia atu bele halo prevesaun ba atividade ilegál iha fronteira.

“Maibé ita garantia de’it ba polísia, ha’u hanoin katak difisíl tebes, maibé kuandu ita hotu iha kooperasaun ba malu ho di’ak, hosi komunidade tantu polísia, ha’u hanoin katak ita bele rezolve atividade ilegál sira ne’ebe mak tama iha ita-nia rai”, António konklui.

Tuir dadus, UPF iha membru efetivu ho totál 300-resin hodi kobre zona fronteirisa ho totál área 272,2 kilómetru kuadradu.

Jornalista : Natalino Costa

Editór : Zezito Silva

Publisidade

Leave a Reply

Latest Post

error: Content is protected !!