Na’in-neen sei ba Finlándia iha 28 jullu observa prosesu produsaun passaporte

DILI, 18 jullu 2023 (TATOLI) – Ministru Justisa (MJ), Amandio de Sá Benevides, hateten ministériu sei haruka ema na’in-neen, iha 28 jullu, ba Finlándia ho objetivu atu observa direta prosesu produsaun passaporte.
Nia adianta, ekipa ne’e sei aranka iha 28 jullu, kompostu hosi Diretór Jerál Servisu Rejistu Notariadu, Tékniku Ministériu Justisa inklui tékniku hosi Ministériu Negósiu Estranjeiru no Kooperasaun (MNEK).
“Ekipa ne’e sei estadia iha Finlándia durante loron 13 nia-laran, durante sira-nia estadia iha ne’ebá atu halo akompañamentu ba prosesu inísiu ba produsaun passaporte nian, liuliu atu verifika ho di’ak kualidade kaderneta passaporte parte exteriór no interior inklui halo verifikasaun ba seguransa passaporte nian, atu hatene loloos kualidade passaporte, molok fó biban ba kompañia fornesedór atu halo produsaun”, Amandio de Sá Benevides hateten ba TATOLI iha Parlamentu tersa ne’e.
Amandio dehan, atu garante kualidade Passaporte Timor-Leste, hanesan Ministru Justisa hetan ona orientasaun hosi Xefe Governu, Xanana Gusmão, atu ba Finlándia hodi halo observasaun direta ba prosesu produsaun passaporte.
“Ha’u hetan ona orientasaun katak iha inísiu agostu, ha’u mós sei dezloka bá Finlándia para ba haree kualidade produsaun passaporte ita-nian, molok halo aprovasaun ikus, hodi fó oportunidade ba kompañia hodi hahú halo produsaun”, Amandio afirma.
Nia rekorda, kontratu ba produsaun passaporte antes ne’e Governu anteriór selebara ona ho Empreza Visi Mitra no Thales hodi halo produsaun ba passaporte.
“Produsaun ba passaporte ita-nian, Governu interór selebra ona kontratu ho Kompañia Visi Mitra ho Thales hodi halo produsaun passaporte ba fase dahuluk tinan ne’e. Passaporte ne’ebé sira atu prodúz tuir kontratu ne’ebé mak iha ba tinan ida ne’e, hamutuk 16.000 ho osan totál $220.000, maibé ha’u hanoin la to’o”, nia relembra.
Tanba ne’e, Ministériu Justisa planea sei ajusta iha orsamentu retifikativu tinan ne’e ba planu akizisaun Passaporte 60.000 tán.
“Agora daudaun ami prepara ona planu ida ne’e iha orsamentu retifikativu, kuandu Parlamentu aprova, Ministériu Justisa sei halo tán akizisaun ba Passaporte hamutuk 60.000. Nune’e ita bele atinje númeru kaderneta Passaporte 72.0000, hodi bele responde ba nesesidade ita-nian”, Governante ne’e hakotu.
Jornalista : Natalino Costa
Editór : Zezito Silva

