PNTL kontinua buka tuir autór habosok labarik ki’ik

DILI 18 jullu 2023 (TATOLI) – Portavós Komandu Jerál Polísia Nasionál Timor-Leste (PNTL), Superintendente Polísia, António Luz, dehan PNTL sei buka tuir hela autór ne’ebé halo video hodi hatauk alin estudante ki’ik-oan sira.
“Ita seidauk ka’er suspeitu ida, ba kazu ida ne’e, kuandu suspeita ona no hetan ona, ami sei bolu midía mai hodi públika ba públiku atu hatene”, António Luz hateten ba jornalista sira iha Komandu Jerál PNTL Caicoli, tersa ne’e.
Maibé Komandu Jerál PNTL kontinua orienta komandante munisípiu no servisu informasaun polísia no polísia komunitária, atu kontinua buka autór ne’ebé halo video hodi habosok alin oan sira.
“Ita sei buka tuir nafatin, ita husu ona ba parte komandante munisípiu sira no servisu informasaun polísia no polísia komunitária atu kontinua buka autór sira ne’e”, nia afirma.
António dehan, maske video ne’e tuir iformasaun balun hateten, halo hanesan tik tok, maibé ba ida ne’e polísia konsidera ameasa ona no hatauk ona labarik sira, tanba ne’e labele, PNTL kontinua buka tuir autór sira ne’e hodi submete ba prosesu.
Iha fulan kotuk mosu video ida ne’ebé virál iha rede sosiál facebook, iha sidadaun feton no mane ida kondúz motór hodi halo video habosok alin estudante oan sira no alin sira ne’e sente tauk ho liafuan ne’ebé sidadaun rua ne’e hasai.
Jornalista : Natalino Costa
Editór : Zezito Silva

