EKONOMIA, BAUCAU, HEADLINE, MUNISÍPIU

Asosiasaun Kuda Tomate husu Governu halo intervensaun ba Tomate rai seluk ne’ebe sirkula iha merkadu

Asosiasaun Kuda Tomate husu Governu halo intervensaun ba Tomate rai seluk ne’ebe sirkula iha merkadu

Asosiasaun Kuda Tomate munisípiu Baucau realiza konferénsia imprensa hodi husu Governu hapara importansaun tomate hosi estranjeiru mai Timor-Leste, kuarta (19/07). Imajen Agência TATOLI/Natalino Belo.

BAUCAU, 19 jullu 2023 (TATOLI) – Asosiasaun Kuda Tomate (AKT) munisípiu Baucau husu Governu halo intervensaun ba Tomate hosi rai seluk ne’ebé sirkula iha territóriu Timor-Leste tanba tomate rai-laran sufisiente fornese ba merkadu.

Portavós Asosiasaun Kuda Tomate (AKT) munisípiu Baucau, Venancio da Costa, hato’o lamentasaun ba Ministériu Agrikultura, Peska no Florestral (MAPF) no Ministériu Komérsiu no Indústria (MKI) atu hapara importasaun tomate hosi estranjeiru nune’e produtu rai-laran bele folin iha merkadu.

“Ami husu ba Ministériu Komérsiu no Indústria atu hapara tomate hosi rai-li’ur liuhosi fornteira ne’ebé agora fa’an iha merkadu Dili no munisípiu seluk,” Portavós Asosiasaun Kuda Tomate Baucau hateten iha Buruma, kuarta ne’e.

Alende ne’e, AKT hosu ba Prezidente Republika (PR) no Primeiru Ministru, atu fó atensaun ba membru governu hodi hapara importasaun tomate mai Timor-Leste.

Antes ne’e, Asosiasaun Kuda Tomate Baucau fasilita ona tomate ba kompañia manán-na’in cesta bázika nune’e sempre garantia kuantidade tomate iha rai-laran.

“Husu ba Ministériu Agrikultura atu kontrola mekanismu nune’e ami bele hetan fini tomate ne’ebé di’ak,” Venancio da Costa akresenta.

AKT husu atu governu tau importánsia ba agrikultór kuda tomate nune’e bele ajuda estadu redús númeru dezempregu no hasa’e rendimentu família liuliu bele hasa’e ekonomia iha kada uma-kain.

Venancio da Costa, argumenta, antes importasaun mai rai-laran folin tomate iha merkadu normál no sufisiente ba merkadu hanesan kada kilograma $1,25.

João Correia da Silva ‘Lafaek’ nu’udar agrikultór tomate durante ne’e hamutuk ho membru grupu hamutuk na’in-70 resin, esplika, husu Primeiru Ministru atu fó atensaun MKI kona-bá importasaun tomate tanba bele hamate produsaun lokál nune’e bele eleva komunidade nia vida ekonomia iha rai-laran liuliu munisípiu Baucau.

“Husu ba governasaun fó atensaun sériu ba situasaun ida-ne’e nune’e povu bele iha rendimentu sufisiente hodi sustenta família,” João da Silva argumenta.

ATK iha evidénsia imajen hanesan karreta Carry ho xapa-matríkula DH hakat liña fronteira hodi importa produtu tomate hosi Atambua, Kupaun Timor Osidentál, Indonézia mai Timor-Leste hodi fa’an iha merkadu rai-laran.

Totál membru Asosiasaun Kuda Tomate Baucau rejista membru hamutuk na’in-539, komposta hosi suku Buruma, Seiçal, Bahu, Tirilolo, Bucoli, Trikoka, Afaça, Uailili no Caibada ne’ebé durante ne’e hatama ba supermekadu inklui merkadu tradisionál iha munisípiu sira.

Jornalista     : Natalino Belo 

Editór             : Evaristo Soares Martins 

iklan
iklan

Leave a Reply

iklan
error: Content is protected !!