“Coach” Josh Margetts fó formasaun ba treinadór juveníl 25
DILI, 19 jullu 2023 (TATOLI) – Diretór Tékniku Federasaun Futeból Timor-Leste (FFTL) Gaspar Quintão, informa “Coach” internasionál hosi nasaun Nova Zelandia fó formasaun ba treinadór juveníl sira hamutuk na’in-25 hodi haklean liután koñesimentu ba jogadór futeból juveníl sira ho kualidade.
“Formasaun ida ne’e, hahú segunda, remata iha kinta, durante loron haat de’it, ida ne’e programa FFTL nian atu mellora liután kapasidade treinadór juveníl sira-nian atu fó treinamentu ba ita-nia jogadór sira ho idade 09-12 ho kualidade liután hodi prepara ba futuru jogadór selesaun nasionál nian”, Quintão dehan ba Agência TATOLI iha Kampu Futeból Lecidere Dili, foin lalais ne’e.
Nia dehan, treinadór hirak ne’e mai hosi Sentru Futeból Juveníl Timor-Leste (SFJTL) no Munisípiu sira iha territóriu nasionál.
“Treinadór sira ne’ebé mai tuir formasaun ne’e, durante ne’e fó hela treinamentu ba ita-nia jogadór juveníl sira iha munisípiu no sentru sira iha kapital Dili”, nia dehan.
Treinadór internasionál Josh Margetts, UEFA mak fó kontratu ba nia hodi mai Timor-Leste nune’e bele fó treinamentu ba treinadór juveníl sira.
Jornalista: Hortencio Sanchez
Editór : Zezito Silva
