HorEX Baucau atende hela Bebé ne’ebé deskoñesidu soe
BAUCAU, 19 jullu 2023 (TATOLI) – Bebé feto ne’ebé ema deskoñesidu soe iha aldeia Lutumutu, suku Tirilolo, atúal kondisaun normál no kontinua hala’o taratamentu intensivu iha Ospitál Rejionál Eduardo Ximenes (HorEX, sigla portugés) munisípiu Baucau.
Bebé refere presiza kuidadu ho intensivu tuir tanba kondisaun inisiál menus hosi normál ka seidauk to’o tempu atu partu nune’e seidauk bele dertermina loron atu fila ba uma.
“Bebé nia kondisaun normál no ita tau mangeira inklui fó hemu susu-been formula tanba laiha nia mamá,” Médiku jerál HorEX Baucau, Zenoveva Soares esplika.
Zenoveva Soares, informa, Polísia Nasionál Timor-Leste (PNTL) akompaña ho VPU eskuadra Baucau Vila inklui família ne’ebé transporta kedas Bebé refere purvolta oras 20:00 kalan ho kondisaun ladún normál tanba sofre iportemiku menus 32⁰C.
Nune’e, ekipa profisionál saúde sira halo kedas atendimentu no atuál kondisaun normál hanesan fuan, dada iis normál no tanis maka’as ho todan grama 1.700 nune’e baixa hela iha sala Neunatologio HorEX hodi hein rekuperasaun.
Tuir kronolojia, Andri Marcel Belo Casameta hamutuk ho nia kolega na’in-rua bainhira tunu hela manu-lin rona Bebé tanis, tanba pániku Andri hato’o kedas ba nia avo feto Agenlina Soares hodi haree no lori ba uma.
Nune’e informa kedas ba eskuadra PNTL Baucau Vila no parte autoridade seguransa to’o iha fatin akontesimentu hodi transporta ba Ospitál Referál Eduardo Ximenes.
“Bebé ne’e soe tara iha ai-sanak leten ho kondisaun isin-molik no husar talin seidauk tesi,” Cristalina dos Santos Sarmento hateten iha HorEX, Vila Nova, kuarta ne’e.
PNTL Baucau kontinua buka-tuir suspeitu ne’ebé soe Bebé refere hafoin patrulla eskuadra PNTL Baucau Vila iha loron-tersa, 18 jullu purvolta oras 19:00 kalan hamutuk ho VPU simu informasaun kona-ba kazu ema deskoñesidu soe Bebé iha área Waituni, bairru Uatulete, aldeia Lutumutu, suku Tirilolo hafoin hetan hosi Andri Marcel Belo Casameta idade 12 purvolta oras 05:30 lorokraik.
Jornalista : Natalino Belo
Editór : Evaristo Soares Martins
