UNPAZ husu MESSK reavalia enserramentu kampus ramu iha Oé-Cusse no Covalima
DILI, 19 jullu 2023 (TATOLI) – Reitór Universidade da Paz (UNPAZ), Adolmando Amaral, husu ba Ministru Edukasaun Superiór, Siénsia no Kultura (MESSK), José Honório Jerónimo, atu halo fali avaliasaun ba kampus ramu UNPAZ nian iha Oé-Cusse no Covalima ne’ebé taka ona.
“Ita husu konsiderasaun IX Governu atu loke fali prosesu avaliasaun ba ita-nian kampus ramu rua iha Oé-Cusse no Covalima, tanba ministru Longuinhos dos Santos [iha Governu anteriór) enserra tiha iha fulan rua ba kotuk no nia rezultadu ne’e publika ona iha Jornál Repúblika,” Adolmando dehan iha Ai-mutin, kuarta ne’e.
Nia salienta prosesu taka kampus ramu ne’e tanba konsidera viola regra no lakumpre rekomendasaun ne’ebé maka avaliadór sira fó ba UNPAZ atu kompleta iha tinan rua nia laran no daudaun ne’e universidade esforsu hela atu kompleta.
“Ami atu obedese loos ba rezultadu ida ne’ebé tanba iha desizaun rua maka Governu anteriór halo, rezultadu ida avaliadór sira mak halo, depois desizaun seluk mai husi rezultadu inspesaun ne’ebé ministru anteriór rasik mak halo”, kestiona.
Tuir responsavel, rezultadu avaliasaun ne’ebé avaliadór sira halo ne’e rekomenda ba UNPAZ atu tinan rua nia laran ne’e tenke hadi’a infraestrutura balun maka hanesan konstrui jardín iha kampus ramu rua, hadi’a garajen karreta no tenke loke kantina iha kampus ramu rua ne’e. “Indikadór sira ne’e mak UNPAZ halo ona”.
Nia salienta ministru anteriór ho ninia ekipa tun bá halo inspesaun direta depois fila mai laiha rekomendasaun ida ba UNPAZ no rona fali katak kampus ramu rua ne’e taka ona no rezultadu ne’e rasik públika ona iha Jornál da Repúblika iha fulan maiu liubá.
Ho problema sira ne’e maka UNPAZ sei hato’o fali nia proposta ba IX Governu atu husu fali avaliasaun, maibé MESSK tenke kria ekipa avaliadór ida ho kualifikasaun mínima doutoramentu, nune’e bele komprende didi’ak prosesu avaliasaun ne’e rasik.
UNPAZ prepara ona proposta avaliasaun atu submete ba ministériu iha tempu besik, nune’e bele hetan resposta sedu atubele halo preparasaun di’ak liután.
Jornalista: Tomé Amado
Editora: Maria Auxiliadora
