Asidente kamioneta iha Metinaro rezulta na’in-tolu lakon vida no tolu kanek todan

DILI, 21 jullu 2023 (TATOLI) – Asidente tráfegu entre kamioneta ho kamioneta iha área Metinaro, Munisipiu Díli, rezulta ema na’in-tolu mak mate no na’in-tolu mak kanek todan.
tuir kronolojia katak asidente tráfigu ne’e akontese iha sesta (21/7), tuku 14:00 loraik ne’e, iha kamioneta rua mak halai tutuir malu ho diresaun ida de’it, hosi Díli ida atu ba Manleu Metinaro no ida atu ba Venilale.
Maibé derepente iha área Metinaro, kamioneta (truck) rua ne’e, ida atu ultrapasa dalan iha Metinaro nian, nune’e rezulta soke malu, tanba kamioneta ida kotuk halai ho velosidade makas tebes, nune’e kondutór lakon kontrolu to’o soke kamioneta iha oin no kontinua halai baku fila kedan.
“Asidente ne’e kamioneta ho kamioneta. Kamioneta rua ne’e, hosi diresaun Díli hotu, ida atu ba Venilale, maibé to’o Metinaro hetan asidente no asidente ne’e nain rua mate fatin, ida mak mai mate iha Hospitál Nasionál Guidu Valadares no ema na’in-tolu mak kanek todan”, Xefe Departetementu Tránzitu Seguransa Rodaviária Nasionál Superintiedente Asistente Luis da Costa ba TATOLI via telefône, sesta ne’e.
Nia dehan, agora daudaun parte Tránzitu Seguransa Rodaviária Munisípiu Díli no Tránzitu Nasionál sei halo hela levantamentu dadus iha terenu.
“Ha’u-nia ekipa agora daudaun sei halo hela levantamentu ba asidente tráfegu ne’e, ema hira mak ohin iha truck ne’e nia laran, hirak hetan kanek kaman, kanek grave. Maibé informasaun insiu ha’u simu ne’e iha ema na’in-tolu mak mate no na’in-tolu mak kanek grave, agora transporta ona ba HNGV, atu halo tratamentu”, Superintindente Asistente Luis da Costa informa.
Jornalista : Natalino Costa
Editór : Zezito Silva

