Top

 MJ sei forma ekipa halo revizaun ba PED iha setór Justisa 

Ministru Justisa, Amândio de Sá Benevides. Imajen Tatoli/Francisco Sony

DILI, 21 jullu 2023 (TATOLI) – Ministru Justisa (MJ) Amandio de Sá Benevides, hateten sei forma ekipa ida atu aselera halo revizaun ba Planu Estrátejiku Dezenvolvimentu (PED) 2011-2030 iha área justisa nian.

Goverante ne’e hateten, presiza halo revizaun ba PED iha setór justisa nian atu haree progresu saida mak setór justisa Timor-Leste atinje ona, ne’ebé deskreve iha Planu Estratéjiku Dezenvolvimentu.

“Hanesan Ministru Justisa fó prioridade agora mak oinsá atu rezolve problema kaderneta pasaporte no seluk mak presiza forma ekipa ida ne’ebé kompostu hosi parseiru sira atu haree hodi halo revizaun ba setór justisa nian, ne’ebé deskreve iha Planu Estratéjiku Dezenvolvimentu  2011-2030, atu nune’e bele avalia fila fali metas saida mak ita alkansa tiha ona, saida mak seidauk halo, tán saida mak ita seidauk alkansa, atu Ministériu Justisa bele la’o nafatin iha korridór”, Amandio de Sá Benevides hateten ba jornalista sira iha Ministériu Justisa, Colmera sesta ne’e.

Nia dehan, revizaun ne’e importante tebes, tanba atu Ministériu Justisa bele adapta aan ba konjuntura polítika oin loron nian, liuliu ba iha situasaun ekonomia sosiál no polítika rai-laran.

Tanba, dala barak institusaun balun labele atinje metas ne’ebé iha Planu Estratéjiku Dezenvolvimentu, tanba kauza hosi lejislasaun balun ne’ebé difikulta labele atinje metas ne’ebé iha, tanba ne’e presiza halo revizaun ba enkuadramentu legál balun atu fó biban ba ema hodi atinje metas sira tuir PED 2011-2030.

“Ita presiza halo revizaun ba lei orgaun judisiária sira, Ministériu Públiku no Defensoria Públika, atu bele responde ba nesesidade insitutusionál”, nia afirma.

Nia esplika, iha setór judisiál liuliu rekursu ba Juiz sira sei to’o ohin loron menus tebes, Juiz atuál foin ema nain-34, Juiz iha primeira klase sei oituan, inklui rekursu ba Prokuradór Primeira klase sei oituan no rekursu ba defensoria mós sei menus.

Tanba tuir lei, Juiz ne’ebé atu promové ba primeiru klase tenke esperiénsia iha Juiz tinan 15  nune’e mós ba prokuradór sira.

“Agora ita-nia rekursu Juiz Primeira klase no Prokuradór Primeira klase sei menus no agora ita atu estabelese Supremu Tribunál Justisa, Tribunál Rekursu, Tribunál Judisiál Primeiru Instánsia no Tribunál Kontas, ita presiza ema atu tur iha fatin sira ne’e, maibé rekursu Juiz sira atu ba ida ne’e sei mens tebes”, nia realsa.

“Entaun ita tenke halo revizaun ba lei para aumenta ita-nia rekursu Juiz no Prokuradór inklui ba Defensória sira, tanba atu garantia asesu ba povu ho di’ak, tenke aumenta autór judisiáriu, liuliu juiz sira númeru tenke sufisiente para atinje ida ne’e”, nia adianta.

Jornalista : Natalino Costa

Editór : Zezito Silva

Publisidade

Leave a Reply

Latest Post

error: Content is protected !!