Japaun hakarak hametin kooperasaun ho TL iha área desportu
DILI, 25 jullu 2023 (TATOLI) – Ministru Juventude Desportu no Arte Kultura (MJDAK) Nélio Issac Sarmento, dehan Embaxada Japaun iha Timor-Leste hakarak hametin liután kooperasaun entre nasaun rua iha área desportu.
“Povu Japaun nia intensaun hakarak halo kooperasaun ho Timor-Leste iha área desportu nian atu dezenvolve liután hanesan desportu sira ne’ebé mai hosi kultura Japaun nian hanesan Kempo, Karate-do no seluk tan”, ministru dehan ba jornalista sira iha edifísiu MJDAK Lecidere, tersa ne’e.
Nia haktuir, Japaun hakarak hatene klean kona-ba programa IX Governu nian liuliu MJDAK ne’ebé ko’alia kona-ba juventude no desportu.
“Sira hakarak hatene klean kona-ba ita-nia programa ne’ebé foin aprova loron hira ba kotuk ne’e iha área desportu no juventude ita presiza dezenvolve hosi ne’ebé sira hakarak apoiu ita hodi dezenvolve”, Nelio revela.
Tanba ne’e, Governu ne’ebé lideradu hosi lidér Karismátiku Kay Rala Xanana Gismão sei servisu makas atu hametin liután kooperasaun entre Timor-Leste no Japaun iha área saida de’it ne’ebé hodi tulun dezenvolvimentu nasaun.
Iha okaziaun ne’e, Embaxadór Japaun iha Timor-Leste Kymura Jetsuia, hateten MJDAK sai hanesan parte prioridade ida ba Governu Japaun hodi halo kooperasaun di’ak liután atu promove modalidade desportu iha nasaun ne’e.
“Ami sei servisu hamutuk ho ministériu ida ne’e atu halo kooperasaun atu dezenvolve makas iha área desportu nian, maibé kona-ba juventude nian, Japaun iha kooperasaun ho UNDP ne’ebé la’o hela daudaun ne’e, voluntáriu Japaun nian, na’in-hitu hodi servisu ho joven sira iha Timor-Leste, voluntáriu hirak ne’e balun servisu iha eskola sekundáriu sira no balun iha universidade sira iha Dili laran”, embaxadór dehan.
Japaun promote nafatin servisu makas ho Governu Timor-Leste hodi dezenvolve desportu no hasa’e koñesimentu juventude sira-nian iha área importante ne’ebé presiza.
Jornalista: Hortencio Sanchez
Editór : Zezito Silva
