Top

Xina apoia ekipamentu komunikasaun Interpol ba PCIC

Governu Xina apoiu ekipamentu sistema komunikasaun 1-24/7 ba Polísia SientÍfika Investigasaun Kriminál (PSIC-Sigla Portugés)Timor-Leste, iha salaun Ministériu Justisa Dili, tersa (25/07). Imajen Tatoli/Francisco Sony

DILI, 25 jullu 2023 (TATOLI) – Embaixada Xina iha Timor-Leste apoia ekipamentu sistema komunikasaun International Police (Interpol) ho tipu I24-7 ba Polísia Sientífika Investigasaun Krimenál (PCIC, sigla portugés), atu fasilita Interpol Timor-Leste ne’ebé tutela iha PCIC hodi bele uza komunika ho Interpol sira iha rai liur atu halo kapturasaun internasionál ba ema sira envolve krime transnasionál no tráfiku.

“Ohin serimónia entrega ekipamentu hosi Embaixada Xina ho naran sistema komunikasaun I24-7. Ekipamentu ida ne’e Interpol Timor-Leste atu uza hodi halo komunikasaun entre membru Interpol hosi nasaun sira seluk, karik iha mandadu kapturasaun internasionál, liuliu ema sira envolve krime transnasionál no tráfiku, ita-nia Interpol liuhosi ekipamentu sira ne’e mós bele asesu informasaun”, Diretór PCIC, Vicente Fernandes e Brito hateten ba jornalista sira hafoin serimónia entrega iha salaun enkontru Ministériu Justisa, tersa ne’e.

Nia relembra, Interpol iha nasaun membru hamutuk 194 inklui Timor-Leste dezde 2002.

“Ho apoiu ekipamentu ida ne’e importante tebes atu fasilita servisu Interpol Timor-Leste nian, nune’e bele halo komunikasaun ho Interpol hosi nasaun sira seluk bainhira mosu kazu krime internasionál”, nia afirma.

Diretór lori Estadu Timor-Leste nia-naran kongrula ba Governu Xina ne’ebé disponibiliza ekipamentu nesesáriu sira PCIC.

“Ita agradese tebes ba Governu Xina ne’ebé durante sai ona parseiru di’ak ba PCIC. Tanba la’os de’it foin mak apoiu PCIC ho ekipamentu sira ne’e, maibé apoiu ida ne’e ba dala rua ona tanba antes sira mós apoiu ona ekipamentu laboratóriu teste DNA nian ba PCIC’’, nia reafirma.

Iha fatin hanesan, Reprezentante Embaixadór Xina, Xu Danyang hateten, Xina komprometidu kontinua apoiu dezenvolvimentu polísia judisiál.

Nia dehan, Governu Xina mós prontu atu konvida membru PCIC na’in-lima atu ba tuir formasain iha Xina iha área Police Law Enforcement oinsá atu kapasita membru PCIC hodi eleva sira-nia koñesimentu bainhira halo servisu.

Jornalista; Natalino Costa  

Editór : Zezito Silva 

Publisidade

Leave a Reply

Latest Post

error: Content is protected !!