CAAKUB hakarak sosa tán Hare-Kulit tonelada 90
MALIANA, 26 jullu 2023 (TATOLI)- Sentru Atendimentu Agríkola Kuda Ulun Bobonaro (CAAKUB) hakarak atu sosa tan Hare-kulit tonelada 90 resin hosi agrikultór sira ne’ebé la’ós membru asosiasaun ne’e.
Prezidente CAAKUB, António Barreto, konfirma planu tinan ne’e sei sosa hare kulit hamutuk tonelada 150 hosi grupu agrikultór 28 ne’ebé hamahan-an iha CAAKUB.
Maibé foin lalais ne’e liuhosi atividade tetu hare iha fulan-juñu to’o agora konsege hetan de’it tonelada 40 tanba menus produsaun.
“Asosiasaun ne’e eziste tanba agrikultór sira, ne’ebé ami sei nakloke ba hotu-hotu, ita-nia produsaun menus entaun ami mós sei prontu atu ba hola to’o Mole-Ana, Halekou, bainhira sira kolleta iha fulan-jullu to’o agostu ne’e,” nia imforma ba Jornalista sira, iha Maliana, kuarta ne’e.
Nia dehan, estoke refere la sufisiente tanba iha semana oin CAAKUB sei ba selebra kontratu ho Sentru Lojístika Nasionál (CLN) atu distribui foos rai tonelada 50 no restante atu responde ba nesesidade loja, supermekadu balun iha kapitál Dili no restaurante sira.
Jornalista: Sérgio da Cruz
Editór: Evaristo Soares Martins
