PNTL identifika ona grupu organizadu ne’ebé hadau sasan iha Díli

DILI, 26 jullu 2023 (TATOLI) – Komandante Polísia Nasionál Timor-Leste (PNTL) Munisípiu Díli, Superintendente Xefe Orlando Pereira Gomes, hateten grupu ne’ebé sempre halo asaun hodi hadau ema nia sasan iha Díli, ne’e nudar grupu organizadu tanba ne’e PNTL identifika ona grupu ne’e no tempu badak halo detensaun ba sira hodi submete ba prosesu.
“Ema sira ne’ebé sempre halo asaun hodi hadau sasan sidadaun sira iha tempu kalan ne’e, sira ne’e nudar grupu organizadu. Sira ne’e ami indentifika hotu ona no fatin ne’ebé mak sira konsentra ba atu ba naok ema nia sasán ami identifika hotu ona neneik ami sei kaer sira”, Orlando Pereira Gomes hateten ba jornalista sira iha Tower Fatuhada, kuarta ne’e.
“Sira nia fatin konsentra atu halo asaun ne’e mós ami identifika hotu ona, ami agora orienta ami-nia servisu informasaun sira tau matan hela neneik ita sei kaer sira”, nia informa.
Orlando hateten, orientasaun ba ona ekipa Servisu Informsaun Polísia Munisípiu Díli atu halo servisu iha terenu hamutuk ho komunidade sira, hodi halo movimentu atu haree ema sira ne’ebé gosta hadau sasán, nune’e kuandu autór sira halo asaun hasoru komunidade sira ne’ebé halo movimentu tempu kalan, ekipa bele asegura kedan nia no submete kedan prosesu identifikasaun.
“Ita orienta ona ekipa vijilánsia hamutuk ho komunidade sira atu haree movimentu grupu sira ne’ebé uza motór hadau komunidade nian sasan, kuandu hetan bele submete sira ba prosesu tuir lei”, nia adianta.
Komandante realsa, atu prevene situasaun kriminalidade, iha tempu kalan PNTL Munisípiu Dili la nonok no agora daudaun reforsa operasaun iha tempu kalan liuhosi patrollamentu, la’o ain iha fatin sira ne’ebé konsidera risku.
“Ami agora halo operasaun patrollu rutina, la’o ain iha tempu kalan iha fatin risku iha Díli laran no parte Servisu Informasaun Polísia mós halo monitorizaun ba ema ne’ebé gosta naok ema nia telefone ho sasán iha tempu kalan”, nia afirma.
Komandante PNTL Díli sei bolu lider PSHT no IKS
Iha biaban ne’e mós Komandante PNTL Munisípiu Díl , Superintendente Xefe Orlando Pereira Gomes, sei bolu lider arte marsiál Persaudaraaan Setia Hati Terate (PSHT)no Ikatan Kera Sakti (IKS), tanba iha Gan Lafaek Beto Suku Comoro halo treinu sempre perturba komunidade sira iha fatin refere.
‘’Ha’u notifika ona sira. Ha’u fó ona orden ba Komandante Eskuadra Alexo atu bolu sira mai Komandu Díli, oinsá mak sira bele kontrola ba sira nian membru, tanba kuandu hatene organiza hatene kontrola membru sira ne’ebe mak sempre halo provokasaun”, nia dehan.
Jornalista; Natalino Costa

