TL-Portugal diskute investimentu ekonómiku
DILI, 26 jullu 2023 (TATOLI) – Ministru Negósiu Estranjeiru no Kooperasaun (MNEK) Bendito Freitas hasoru malu ho Ministru Negósiu Estranjeiru Portugal João Gomes Carvinho hodi ko’alia kona-ba kooperasaun bilaterál entre nasaun rua hodi halo investimentu ekonómiku.
“Ministru Negósiu Estranjeiru Portugal nian ami hasoru malu ko’alia kona-ba asuntu bilaterál iha área edukasaun, kona-ba investimentu ekonómiku bainhira Timor-Leste iha ona esforsu hotu adezaun ba ASEAN”, Ministro Bendito dehan ba jornalista-sira iha Hotel Timor Dili, kuarta ne’e.
Nia esplika, kona-ba investimentu ekonómiku oinsa halo ligasaun ho nasaun sira iha ASEAN no Europa atu lori investór boot sira mai investe ina nasaun ne’e hodi dezenvolve ekonomia nasaun nian.
Aleinde ne’e, parte rua ko’alia mós kona-ba mobilidade laborál hodi haree ba joven sira ne’ebé iha hela Portugal no balu foin atu ba nune’e bele iha formasaun bázika kona-ba lingua atu bele adapta ba situasaun iha ambiente servisu.
“Ami ko’alia buat barak, ita agora atu tama ona ba ASEAN presiza asisténsia téknika ruma karik, ita sei bele husu Portugal nia apoiu atu tulun ita, joven sira ne’ebé iha Portugal ona ita sei tau matan nafatin ba sira”, ministru ne’e hakotu.
Jornalista: Hortencio Sanchez
Editór : Zezito Silva
