PNTL asegura estudante na’in-rua halo ‘’check point’’ ba transporte públiku

DILI, 27 jullu 2023 (TATOLI) – Komandu Polísia Nasionál Timor-Leste (PNTL) Munisípiu Díli asegura hela estudante na’in-rua ne’ebé mak halo perturbasaun orden públiku liuhosi asaun halo pasa revista ba karreta mikrolete sira.
“Horseik ita asegura joven na’in-rua, sira nudar estudante ne’ebé eskola hela Novel da Pas, sira iha problema entre sira ho sira (estudante sira) entaun sira hein malu hodi halo check point malu hodi tuda karreta”, Superintendente Xefe Polísia, Orlando Pereira Gomes liuhosi konferénsia imprensa iha Komandu PNTL Dili, Caicoli, kinta ne’e.
“Horseik ita-nia ekipa intelijénsia sira asegura estudante na’in-rua ne’e no lori kedan mai Komandu PNTL Díli hodi submete ba prosesu identifikasaun”, nia adianta.
Komandante PNTL hateten, kualker sidadaun sira laiha direitu atu halo pasa revista ba transporte só polísia.
“Só PNTL halo pasa revista ba transporte, seluk hosi ne’e labele, kuandu mós nune’e PNTL sei toma medida”, nia dehan.
Orlando dehan, atu prevene konfrontu iha área eskola entre estudante sira hanesan eskola sekundária 12 Novembru, Finantil no Dezembru inklui eskola sira seluk ne’ebé sempre hamosu konfrontu, Komandu PNTL sei intensifika patroillu ba iha eskola sira ne’e.
“Ha’u orienta ona Komandante Eskuadra Cristo Rei no Dom Aleixo no Ofisiál Polísia Suku (OPS) atu lao vizita ba eskola sira ne’ebé sempre hamosu konfrontu hodi prevene problema entre estudante ho estudante sira iha eskola”, nia hateten.
Nia afirma, PNTL sei la tolera aktu sira ne’ebé mak halo hosi estudante sira, estudante ne’e devér mak estuda.
“Husu ba ita-nia oan sira liuliu estudante sira labele kria konfrontu iha eskola, aproveita tempu atu estudante hodi aprende atu prepara aan ba futuru ne’ebé di’ak”, Orlando konklui.
Jornalista; Natalino Costa
Editór : Zezito Silva

