PNTL iha ona koñesimentu atividade graduasaun PSHT iha Díli

DILI, 27 jullu 2023 (TATOLI) – Komandante Polísia Nasionál Timor-Leste (PNTL) Munisípiu Díli, Superintendente Xefe Polísia Orlando Gomes, hateten PNTL Díli simu ona karta koñesimentu hosi organizasaun arte marsiál Persaudaraan Setia Hati Terante (PSHT) ba seguransa atividade PSHT ne’ebé sei halao iha Díli iha tempu badak.
“Ita iha ona koñesimentu, ita iha ona orden operasaun ba seguransa ba atividade ba organizasaun PSHT ninian”, Orlando Pereira Gomes dehan liuhosi konferénsia imprensa iha Komandu PNTL Dili, Caicoli, kinta ne’e.
Tanba ne’e, Komandu PNTL Díli hamutuk ho Komandu Operasaun Nasionál reune hamutuk ona hodi trasa planu seguransa ba atividade graduasaun PSHT nian liuliu oinsa mak bele atu akompaña prosesu pré-teste to’o iha graduasaun.
“Husu ba organizasaun arte marsiál PSHT tenke lao tuir orden ne’ebé Komandu PNTL sei hasai iha tempu badak atu atividade sira ne’e lao di’ak labele hetan fali konfrontu durante iha atividade”, nia dehan.
Nia mós husu ba lider PSHT sira tenke kontrola membru sira, lider sira tenke kumpre regra ne’ebé mak iha atu halo tuir regra PNTL Díli nian no regra Komisaun Reguladora Arte Marsiál (KRAM).
“Laiha ida atu lao tuir ninian hakarak, kuandu viola regra ne’e, ita sei foti lider arte marsiál ne’e nian, tanba ne’e husu atu mantein la’o tuir regra, hodi organiza menbru sira la’o tuir orden, la’o tuir lei para nune’e labele mosu insidente”, Orlando adianta.
“Ha’u husu ba lider arte marsiál PSHT iha munisípiu ninian tenke koordena no koopera ho Komandu PNTL Díli atu jere atividade sira ne’e la’o di’ak para labele fó impaktu ba fali iha públiku”, nia konklui.
Organizasaun arte marsiál PSHT sei halo nia atividade graduasaun ba membru 11.000 iha fulan agustu no atividade ne’e sei halo iha Munisípiu Díli, Baucau, Manufahi no Bobonaro.
Jornalista; Natalino Costa
Editór : Zezito Silva

